کراچی میں سبقت لینے والے 2 امیدوار بعد میں ہار گئے

کراچی (اُمت نیوز) کراچی قومی اسمبلی کی نشستوں پر ابتدائی گنتی میں سبقت حاصل کرنے والے 2 امیدوار گنتی مکمل ہونے پر ہار گئے۔

قومی اسمبلی کے حلقے 241 میں پی ٹی آئی کی حمایت یافتہ خرم شیر زمان کو ابتداء میں سبقت حاصل تھی لیکن بعد میں وہ پیپلز پارٹی پارلیمنٹیرین کے امیدوار اختیار بیگ سے شکست کھا گئے۔

اسی حلقے میں متحدہ قومی موومنٹ پاکستان کے فاروق ستار بھی امیدوار تھے جنہوں نے صرف 494 ووٹ لیے۔

خرم شیر زمان کا کہنا ہے کہ 30 گھنٹے بعد آنے والے نتائج سے معلوم ہوا کہ جس نشست پر میں بھاری لیڈ سے جیت رہا تھا وہاں پیپلز پارٹی کا امیدوار کامیاب ہو گیا۔

کراچی میں قومی اسمبلی کے ایک اور حلقے این اے 237 پر جماعت اسلامی کے امیدوار عرفان احمد کی ابتدائی سبقت بعد میں شکست میں تبدیل ہو گئی۔

عرفان احمد پیپلز پارٹی پارلیمنٹیرینز کے امیدوار اسد عالم نیازی سے ہار گئے جبکہ اسی حلقے میں متحدہ قومی موومنٹ کے روف صدیقی بھی امیدوار تھے۔

دوسری جانب گوادر سے قومی اسمبلی کی نشست 259 پر حق دو تحریک کو سبقت حاصل ہے لیکن الیکشن کمیشن کی جانب سے فارم 47 جاری نہیں کیا گیا۔

بلوچستان میں ہی این اے 2 سے پختونخواہ ملی عوامی پارٹی کے محمود خان اچکزئی کو سبقت حاصل ہے لیکن اس نشست پر بھی فارم 47 جاری نہیں ہوا۔