بلاول یا شہباز وزیراعظم بن سکتے،منظور وسان کی پیش گوئی

کراچی (امت نیوز) پیپلز پارٹی کے سینئر رہنما منظور وسان نے پیشگوئی کی ہے کہ بلاول ، زرداری یا شہباز شریف وزیر اعظم بن سکتے ہیں۔پی پی رہنما منظور وسان نے حکومت سازی کے حوالے سے ایک اور خواب دیکھنے کے بعد پیشگوئی کی ہے کہ وفاق سمیت ملک کے دو صوبوں پنجاب اور بلوچستان میں اتحادی حکومتیں بننے جارہی ہیں۔

انہوں نے کہا کہ پی پی کو سندھ میں اکثریت ملنے سے حکومت بنانے میں کسی قسم کی کوئی رکاوٹ نہیں ہے جبکہ پی پی وفاق اور بلوچستان میں بھی مضبوط ہے، پی پی پنجاب میں بھی آزاد امیدواروں یا ن لیگ سے مل کر حکومت بنانے کی پوزیشن میں ہے۔ نواز شریف اور مریم نواز دور دور تک وزیراعظم بنتے نظر نہیں آرہے ہیں، شہباز شریف یا پھربلاول بھٹو زرداری کے وزیراعظم بننے کے امکانات روشن ہیں، اگر جوڑ توڑ نہ ہوا تو آزاد امیدوار کو بھی وزیراعظم کا عہدہ مل سکتا ہے۔ گرینڈ ڈیموکریٹک الائنس (جی ڈی اے) ختم ہو چکی ہے، مستقبل میں جی ڈی اے پیپلز پارٹی میں ضم ہو جائےگی۔