سندھ میں موٹرسائیکل ایمبولینس متعارف

کراچی(امت نیوز) سندھ میں جدید ایمبولینس کے بعد پہلی بار جان بچانے والے طبی الات سے آراستہ ایمرجنسی موٹر بائیکس متعارف کرادی گئیں۔ تفصیلات کے مطابق ورلڈ ہیلتھ آرگنائزیشن کے تحت محکمہ صحت نے سندھ انٹیگریٹڈ ایمرجنسی اینڈ ہیلتھ سروسز (1122) کو25 ایمرجنسی بائیکس سپرد کردیں۔ نگراں وزیر صحت ڈاکٹر سعد خالد نیاز نے ای پی آئی سینٹر میں ڈبلیو ایچ او سے جدید طبی آلات سے آراستہ 25 بائیکس وصول کر کے 1122 کے سپرد کردیں۔

موٹربائیکس ایمبولینسز میں آگ بجھانے کے آلات ، منی میڈیسن کٹ، ایمرجنسی بیگ، آکسیجن ماسک، پلس اکسیمیٹر ، گلوکومیٹر ، آکسیجن سلنڈر کی، نیزل کنولا، پولینیک ہارڈ کالر، اسٹیتھو اسکوپ، سی پی آر ماسک، نیبولائزر، ڈریسنگ کٹ شامل ہیں جن کی مدد سے  موٹرسائیکل ایمبولینس مریض تک 5 سے 8 منٹ میں  پہنچ کر علاج کرسکیں گی یا مریض کو فوری ابتدائی طبی  امداد دینے کے بعد  قریبی ایمبولینس  تک پہنچا دیں گی۔ ایمرجنسی کی صورت میں مریض کو نا صرف فرسٹ ایڈ دی جائے گی بلکہ لائف سیونگ میڈیسن ، سی بی آر آلات سے موقع پر علاج کیا جائے گا۔

اس موقع پر نگراں وزیر صحت ڈاکٹر سعد خالد نیاز نے پریس کانفرنس کرتے ہوئے کہا کہ یہ آلات اور بائیکس  ان علاقوں کیلیے جہاں گاڑیاں نہیں ہیں،موٹرسائیکل ایمبولینس سے ٹریفک جام اور شہر کی تنگ گلیوں میں حادثات کی صورت میں ابتدائی طبی امداد کی بروقت ادائیگی یقینی ہوجائے گی۔ریپڈ رسپانس فورس کے طور پر استعمال کی جائیں  گی،  اس کے ذریعے ٹائم رسپانس بڑھ جائے گا ۔ انہوں نے کہا کہ 1100 ایمرجنسی بائیکس کی ضرورت ہے  جبکہ پروگرام میں اس وقت صرف 371  بائیکس ہیں۔