چیف الیکشن کمشنر کی موجودگی میں آزادانہ تحقیقات ممکن نہیں، گوہر خان

راولپنڈی : تحریک انصاف کے رہنما بیرسٹر گوہر علی خان کا کہنا ہے کہ چیف الیکشن کمشنر کی موجودگی میں مبینہ دھاندلی کی آزادانہ تحقیقات ممکن نہیں، استعفا دیں، سابق کمشنر روالپنڈی لیاقت علی چٹھہ اوران کے اہلِ خانہ کو تحفظ دیا جائے۔

اڈیالہ جیل کے باہر بیرسٹر گوہر نے پریس کانفرنس کرتے ہوئے کہا کہ ہمارے امیدوار سنی اتحاد کونسل میں شمولیت اختیار کریں گے، ہم نے کل 50 ایم این ایز کی فہرست الیکشن کمیشن کو بھجوائی تھی۔

بیرسٹر گوہر نے کہا کہ تحریک انصاف قومی اسمبلی میں 180 سیٹیں حاصل کرچکی ہے۔

ان کا کہنا تھا کہ صحیح نتائج عوامی مینڈیٹ کے تحت جاری ہونے چاہئیں، کمشنر راولپنڈی نے واضح بتایا کس قسم کی دھاندلی ہوئی ہے، ہمارا مطالبہ ہے کہ کمشنر راولپنڈی اور ان کے خاندان کو پوری سیکورٹی دی جائے۔

انہوں نے کہا کہ فارم 45 کے تحت نتائج جاری نہ ہوئے تو آئی ایم ایف کا پروگرام متاثر ہوگا۔

انہوں نے مزید کہا کہ ہم نے ایم ڈبلیو ایم کو سپورٹ کیا ہے، وہ مرکز میں ہمارے ساتھ بیٹھیں گے۔

ان کا کہنا تھا کہ یہ مناسب وقت ہے کہ چیف الیکشن کمشنر مستعفی ہوں، ہم بانی پی ٹی آئی کی ہدایات پر چیف الیکشن کمشنر سے استعفے کا مطالبہ کرتے ہیں۔