عوام کو قطاروں میں نہیں لگنے دیں گے، مریم نواز

لاہور: وزیراعلیٰ پنجاب مریم نواز نے گھروں میں رمضان پیکج کی ترسیل کی ڈیجیٹل مانیٹرنگ کا حکم دیدیا اورکہا کہ عوام کو قطاروں میں نہیں لگنے دیں گے، ان کے گھروں میں ان کا حق پہنچائیں گے، رکاوٹ یا غفلت برداشت نہیں کروں گی۔

وزیراعلی پنجاب مریم نواز نے بغیر اطلاع پونچھ ہاؤس میں قائم صوبائی ماڈل رمضان بازار کنٹرول روم جا کر مانیٹرنگ کاجائزہ لیا۔

مریم نواز نے ڈسٹرکٹ،ڈیش بورڈ اورپی آئی ٹی بی کے ڈیش بورڈ کا مشاہدہ کیا اور قیمت ایپ ڈیش بورڈ کا بھی جائزہ لیا۔

وزیراعلیٰ پنجاب نے گھروں میں رمضان پیکج کی ترسیل کی ڈیجیٹل مانیٹرنگ کا حکم دے دیا۔

وزیراعلیٰ مریم نواز نے رمضان پیکیج کی گھروں میں ترسیل کی مانیٹرنگ کی ضرورت پر زوردیا اور کہا کہ عوام کو ان کا حق ان کی دہلیز پر پہنچانا چاہتے ہیں، رکاوٹ یا غفلت برداشت نہیں کریں گے، عوام کو قطاروں میں نہیں لگنے دیں گے، ان کے گھروں میں ان کا حق پہنچائیں گے۔

انہوں نے مزید کہا کہ رمضان پیکیج اوردیگر امور کے بارے میں ڈسٹرکٹ سکور کارڈبنایا جائے گا، خلاف ورزی کی صورت میں نمبر کم ہوں گے۔

وزیراعلیٰ پنجاب نے گھر میں ترسیل کی اطلاع بھی ڈیش بورڈ میں شامل کرنے کی ہدایت کی۔

وزیر اعلیٰ مریم نواز شریف کو بریفنگ میں بتایا گیا کہ 10رمضان تک تمام ضرورت مندوں تک رمضان نگہبان پیکیج پہنچ جائیں گے۔