خیبر پختونخوا میں سینیٹ کی 11 نشستوں پرالیکشن خطرے میں پڑ گیا

اسلام آباد: سینیٹ کی 48 نشستوں میں سے 18 پر امیدوار بلامقابلہ منتخب ہو چکے ہیں جبکہ 11 نشستوں پرالیکشن خطرے میں  ہے ۔

میڈیا رپورٹس کے مطابق سینیٹ کی 48 خالی نشستوں میں سے 18 پرامیدوار بلامقابلہ منتخب کر لیے گئے جبکہ باقی 30 نشستوں پرانتخاب 2 اپریل کو ہو گا۔

خیبر پختونخوا کی 11 نشستوں پر سینیٹ الیکشن خطرات سے دوچار ہے، صوبائی حکومت مخصوص نشستوں پر منتخب ارکان سے حلف نہ لینے پر بدستور بضد ہے۔

الیکشن کمیشن پہلے ہی تنبیہ کر چکا ہے کہ اگر ارکان کو حلف نہ دلوایا گیا تو کمیشن خیبر پختونخوا کی حد تک سینیٹ الیکشن ملتوی کرنے پر مجبور ہو گا، صوبائی حکومت اس معاملے پرکل سپریم کورٹ سے رجوع کرنے کا فیصلہ کر چکی ہے۔

الیکشن کمیشن نے امیدواروں کی حتمی فہرست جاری کر دی ہے، سینیٹ کی 30 خالی نشستوں کے لیے 59 امیدوار میدان میں ہیں، سندھ کی 12، خیبر پختونخوا کی 11، پنجاب کی5 اور وفاقی دارالحکومت اسلام آباد کی 2 نشستوں پر مقابلہ ہو گا۔