پاکستان سے باہمی تجارت کا حجم 10 ارب ڈالر تک لے جانا چاہتے ہیں، ایرانی صدر

اسلام آباد: ایران کے صدر ابراہیم رئیسی نے کہا ہے کہ پاکستان سے باہمی تجارت کا حجم 10 ارب ڈالر تک لے جانا چاہتے ہیں، پاکستان ایرانی مارکیٹ سے فائدہ اٹھاسکتا ہے۔

دورہ پاکستان سے قبل تہران میں میڈیا سے گفتگو میں ابراہیم رئیسی نے کہا کہ پاکستان ہمسایہ اور برادر اسلامی ملک ہے۔ دونوں کے درمیان عوامی اور حکومتی سطح پر تاریخی تعلقات قائم ہیں۔

ان کا کہنا تھا کہ پاکستان میں حکام کے ساتھ سیکیورٹی، اقتصادی اور تجارتی امور پر مذاکرات ہوں گے۔

ابراہیم رئیسی کا کہنا تھا کہ ماضی سے آج تک پاکستان اور ایران میں بہت اچھے سیاسی، اقتصادی اور مذہبی تعلقات ہیں۔

انھوں نے یہ بھی کہا تھا کہ مختلف عالمی مسائل پر ایران اور پاکستان مشترکہ مؤقف رکھتے ہیں، انسانی حقوق، فلسطین، انسداد دہشت گردی جنگ میں پاکستان اور ایران کا مشترکہ مؤقف ہے، دنوں ملک متعلقہ امور پر ایک دوسرے سے تعاون کرتے ہیں۔