سیکیورٹی فورسز، پولیس وین پرحملے، جوابی کارروائی میں 3 دہشتگرد ہلاک

پشاور: پختونخوا میں سیکیورٹی فورسز اور پولیس وین پر حملوں میں جوابی فائرنگ میں3 دہشت گرد ہلاک ہو گئے۔

پولیس کے مطابق ڈی آئی خان میں موٹرسائیکل سوار 3 دہشت گردوں نے روکنے کے اشارے پر سیکیورٹی فورسز اور پولیس کی مشترکہ ناکہ بندی پر اندھا دھند فائرنگ کردی، جس پر فورسز کی جوابی فائرنگ سے تینوں حملہ آور ہلاک ہو گئے۔

سیکیورٹی فورسز اور پولیس کی مشترکہ ناکا بندی دہشت گردوں کی موجودگی کی خفیہ اطلاع پر کی گئی تھی ۔ ناکا بندی اُسی مقام پر قائم کی گئی تھی جہاں سے چند روز قبل ایڈیشنل سیشن جج شاکر اللہ مروت کو اغوا کیا گیا تھا ۔

پولیس کے مطابق مرنے والے دہشت گردوں کے قبضے سے 9 دستی بم‘ کلاشنکوف‘ میگزین‘ مختلف موبائل فونز اور بھاری مقدار میں اسلحہ و گولہ بارود برآمد ہوا ہے۔

دوسری جانب ٹانک میں پولیس وین پر نامعلوم مسلح افراد نے حملہ کیا ہے۔پولیس کے مطابق حملہ آوروں نے ڈی ایس پی سید مرجان کی گاڑی کو نشانہ بنایا۔ نامعلوم افراد نے پولیس وین پرحملہ پنگ کےعلاقہ گلڑا خلہ میں کیا،جہاں فائرنگ کا تبادلہ جاری ہے، پولیس کی بھاری نفری روانہ کردی گئی ہے۔