جن نکلا یا نہیں؟ جعلی پیر کے تشدد نے نوجوان کی جان نکال دی

بہاول نگر: علاقے کھائی بودلہ میں جعلی عامل پیر نے جن نکالتے نکالتے نوجوان کی جان نکال دی۔ پیر اور ساتھیوں کے بہیمانہ تشدد سے ذوالقرنین دم توڑ گیا۔

تھانہ تخت محل پولیسں نے جعلی پیر اور ساتھیوں کے خلاف مقدمہ درج کرکے مرکزی ملزم کو گرفتار کرلیا۔

بہاول نگر کے نواحی گاؤں سونڈھا کے رہائشی ذوالقرنین کا گھرانہ کھائی بودلہ کے جعلی عامل پیر اظہر شاہ کے معتقدین میں سے تھا۔ جعلی پیر کا ان کے گھر آنا جانا تھا۔ اُس نے کہا ذوالقرنین پر جنات کا سایہ ہے۔

عامل کے کہنے پر گھر والوں نے ذوالقرنین کو اس کے ڈیرے پر بھیجا۔ وہاں جہاں اظہر شاہ اور اس کے 3 چیلوں نے جن نکالنے کی آڑ میں ذوالقرنین پر اتنا تشدد کیا کہ وہ جان سے ہاتھ دھو بیٹھا۔

جعلی پیر نے نوجوان کے گھر والوں کو اطلاع دی کہ اس کی طببعت زیادہ خراب ہوگئی ہے۔ جب اہلِ خانہ وہاں پہنچے تو اُنہیں لاش تھمادی گئی۔

غسل کے دوران معلوم ہوا کہ ذوالقرنین کے جسم پر بہیمانہ تشدد کے نشان ہیں۔ ذوالقرنین کی میت پوسٹ مارٹم کے لیے ڈسٹرکٹ اسپتال بہاول نگر منتقل کی گئی۔

تھانہ تخت محل پولیسں نے مقتول کے بھائی محمد گلفام کی مدعیت میں جعلی پیر اور ساتھیوں کے خلاف مقدمہ درج کرکے اظہر شاہ کو گرفتار کرلیا جبکہ چیلے فرارہوگئے جن کی گرفتاری کیلے چھاپے مارے جا رہے ہیں۔