غزہ میں مزید 25 فلسطینی شہید، چینی صدر کا عالمی کانفرنس بلانے کا مطالبہ

غزہ- بیجنگ :جنوبی غزہ کے علاقے رفح پر اسرائیلی فوج کے فضائی حملے جاری ہیں۔ تازہ ترین حملوں میں مزید 25 ہزار فلسطینی شہید ہوگئے۔

صہیونی فوج نے رفح کے علاوہ خان یونس، جبالیہ اوردیرالبلاح میں بھی حملے کیے ہیں۔ 24 گھنٹوں میں اسرائیلی حملوں کے نتیجے میں 80 سے زائد فلسطینی شہید ہوچکے ہیں۔ مجموعی شہادتیں 36 ہزار 171 ہوگئیں۔

دریں اثنا چین کے صدر شی جنپنگ نے 4 عرب ممالک کے سربراہی اجلاس کا آغاز کرتے ہوئے مطالبہ کیا کہ اسرائیل اور حماس جنگ پر بین الاقوامی امن کانفرنس کی اشد ضرورت ہے۔

عالمی خبر رساں ادارے کے مطابق صدر شی جنپنگ نے چین-عرب تعاون فورم کے افتتاحی اجلاس سے خطاب کرتے ہوئے کہا کہ اسرائیل حماس جنگ کی ہولناکی بڑھتی جا رہی ہے۔

چینی صدر شی جنپنگ نے عرب ریاستوں پر زور دیا کہ وہ تجارت، توانائی، خلائی تحقیق اور صحت کی دیکھ بھال جیسے شعبوں میں تعاون اور اشتراک کو مزید مضبوط اور مستحکم کریں۔

صدر شی جنپنگ نے مطالبہ کیا کہ مشرق وسطیٰ میں قیام امن کے لیے غزہ کی صورت حال پر بین الاقوامی کانفرنس کا انعقاد کیا جائے اور غزہ کے معاملے پر چین، عرب ممالک کے ساتھ مل کر کام کرنے کو تیار ہے۔

چین عرب سمٹ میں مصر کے صدر السیسی، متحدہ عرب امارات کے صدر شیخ محمد بن زاید، بحرین کے بادشاہ حماد اور تیونس کے صدر  قیس سعید نے شرکت کی۔

اس سمٹ میں چین کے بڑھتے ہوئے تجارتی تعلقات اور اسرائیل-حماس جنگ سے متعلق سیکورٹی خدشات پر تبادلہ خیال کیا گیا۔