امریکی کرکٹر نے حارث رؤف پر بال ٹیمپرنگ کا الزام لگا دیا

ڈیلاس: ٹی ٹوئنٹی ورلڈکپ میں امریکا کے ہاتھوں ہزیمت اٹھانے کے بعد فاسٹ بالر حارث رؤف پر بال ٹیمپرنگ کا الزام بھی لگ گیا۔

امریکی کرکٹر رسٹی تھیرون نے سماجی رابطے کی ویب سائٹ ایکس پر ٹوئٹ میں پاکستانی ٹیم کے فاسٹ بالر حارث رؤف پر بال ٹیمپرنگ کا الزام عائد کرتے ہوئے کہا کہ میچ کے دوران فاسٹ بولر نے انگلی کے ناخن کا استعمال کرتے ہوئے گیند کے ساتھ چھیڑ چھاڑ کرنے کی کوشش کی۔

امریکی کرکٹر رسٹی تھیرون نے آئی سی سی کو ٹیگ کرتے ہوئے سوال کیا کہ کیا ایسا دکھانے کی کوشش کی جارہی ہے کہ بائولر نے ٹیمپرنگ نہیں؟ گیند تبدیل ہونے کے محض 2اوورز بعد کیسے سوئنگ ہونے لگی؟۔

واضح رہے کہ گزشتہ روز پاکستان کو امریکا کے ہاتھوں سپر اوور میں شکست کا سامنا کرنا پڑا تھا۔