شاہینوں نے بھارتی سورماؤں کو جکڑ لیا، پوری ٹیم 119 رنز پر ڈھیر

 

نیویارک (اُمت نیوز) آئی سی سی مینز ٹی 20 ورلڈ کپ کے بڑے مقابلے میں بھارت نے پاکستان کو جیت کیلئے 120 رنز کا ہدف دے دیا۔

نیویارک کے نیساؤ کاؤنٹی سٹیڈیم میں پاکستان اور بھارت کے درمیان ہونیوالے بڑے مقابلے میں پاکستان کرکٹ ٹیم کے کپتان بابر اعظم نے ٹاس جیت کر حریف ٹیم کے کپتان روہت شرما کو پہلے بیٹنگ کی دعوت دی تاہم بھارت کی پوری ٹیم 19 اوورز میں 119 رنز بنا کرپویلین لوٹ گئی، ریشبھ پنٹ 42 رنز بنا کر نمایاں رہے۔

بھارت کی جانب سے کپتان روہت شرما اور ویرات کوہلی نے اننگز کا آغاز کیا اور ایک اوور میں بغیر کسی نقصان کے 8 رنز بنائے تاہم دوبارہ بارش شروع ہونے کے باعث میچ کو ایک بار پھر روک دیا گیا، واضح رہے کہ ٹاس سے قبل بھی بارش کے باعث میچ تاخیر سے شروع ہوا ہے۔

بارش روکنے پر میچ کا دوبارہ آغاز ہوا اور دوسرے اوور کی دوسری گیند پر 12 رنز کی مجموعی سکور پر ویرات کوہلی 4 رنز بناکر نسیم شاہ کی گیند پر آؤٹ ہوگئے جبکہ تیسرے اوور کی چوتھی گیند پر کپتان روہت شرما 13 رنز بنا کر شاہین شاہ آفریدی کی گیند پر کیچ آؤٹ ہوگئے۔

بھارت کی تیسری وکٹ 58 رنز کے مجموعی سکور پر گری جب اکشر پٹیل 20 رنز بناکر نسیم شاہ کا شکار بنے، چوتھی وکٹ 89 کے مجموعی سکور پر گری جب سوریاکمار یادیو 7 رنز بناکر حارث رؤف کی گیند پر کیچ آؤٹ ہوئے۔

پانچویں وکٹ 95 رنز کے مجموعی سکور گری جب شیوام ڈوبے3 رنز بناکر نسیم شاہ کی گیند پر کیچ تھما بیٹھے جبکہ چھٹی وکٹ ریشبھ پنٹ کی گری جو 42 رنز بنا کر عامر کی گیند پر کیچ آؤٹ ہوئے جبکہ اگلی ہی گیند پر عامر نے رویندر جدیجا کو بولڈ کرکے بھارت کی ساتویں وکٹ صفر پر گرادی۔

بھارت کی آٹھویں وکٹ112 کے مجموعی سکور پر گری جب ہارڈک پانڈیا حارث رؤف کی گیند پر 7 رنز بنا کر کیچ تھما بیٹھے جبکہ اگلی ہی گیند پر حارث رؤف نے جسپریت بمرا کو صفر پر آؤٹ کردیا۔

ٹاس کے موقع پر گفتگو کرتے ہوئے کپتان بابر اعظم نے کہا کہ پاکستان کرکٹ ٹیم ایک تبدیلی کے ساتھ میدان میں اترے گی، اعظم خان کی جگہ عماد وسیم پلیئنگ الیون کا حصہ ہوں گے۔

بابر اعظم نے کہا کہ بھارت کیخلاف میچ میں 100 فیصد کارکردگی دکھائیں گے ، پاور پلے میں اچھی باؤلنگ کا مظاہرہ کریں گے۔

دوسری جانب بھارتی کرکٹ ٹیم کے کپتان روہت شرما نے کہا کہ آج کےمیچ میں بھارتی ٹیم میں کوئی تبدیلی نہیں کی گئی، اگر ہم ٹاس جیت جاتے تو پہلے فیلڈنگ کا فیصلہ کرتے، کوشش ہوگی آج کے میچ میں بڑا ہدف دیں۔

واضح رہے کہ پاکستان کو ایونٹ میں اپنے پہلے میچ میں امریکا کے ہاتھوں سپر اوور میں شکست کا سامنا کرنا پڑا تھا۔

قومی سکواڈ

پاکستان کرکٹ ٹیم کی قیادت بابراعظم کررہے ہیں، دیگر کھلاڑیوں میں محمد رضوان، عثمان خان، شاداب خان، فخرزمان ، افتخاراحمد، عماد وسیم ، محمد عامر، نسیم شاہ شاہین شاہ آفریدی اور حارث رؤف آج ایکشن میں ہوں گے۔

بھارتی سکواڈ

بھارتی ٹیم کی کپتانی روہت شرما کر رہے ہیں۔ دیگر کھلاڑیوں میں ویرات کوہلی، ریشبھ پنٹ، سوریاکماریادیو، شیوام ڈوبے، ہارڈک پانڈیا، رویندرا جڈیجا، اکثرپٹیل، جسپریت بمرا، محمدسراج اور ارشدیپ سنگھ بھارتی ٹیم میں شامل ہیں۔