ٹی20 ورلڈکپ؛ آسٹریلیا نے اسکاٹ لینڈ کو ہرا کر انگلینڈ کو بچالیا

سینٹ لوشیا(اُمت نیوز)آئی سی سی ٹی20 ورلڈ کپ کے 35 میچ میں آسٹریلیا نے اسکاٹ لینڈ کو 5 وکٹوں سے شکست دے دی۔

آسٹریلیا نے اسکاٹ لینڈ کا 181 رنز کا ہدف 19.4 اوورز میں 5 وکٹوں کے نقصان پر حاصل کر لیا۔

کینگروز کے بیٹسمین ٹریوس ہیڈ سب سے نمایاں بیٹسمین تھے جنہوں نے 68 رنز کی شاندار اننگز کھیلی، مچل مارش نے 8، گلین میکسویل 11 اور مارکوس اسٹوئنس نے 59 رنز کی اننگز کھیلی، ٹم ڈیوڈ 24 رنز پر ناٹ آؤٹ رہے۔
اسکاٹ لینڈ کی جانب سے سفیان شریف اور مارک واٹ نے 2،2 کھلاڑیوں کو آؤٹ کیا، جبکہ بریڈ وہیل نے 1 وکٹ حاصل کی۔

اس سے قبل آسٹریلیا نے ٹاس جیت کر اسکاٹ لینڈ کو پہلے بیٹنگ کی دعوت دی، اسکاٹ لینڈ نے مقررہ 20 اوورز میں 5 وکٹوں کے نقصان پر 180 رنز بنائے۔

اسکاٹ لینڈ کے برینڈن میکمولن سب سے نمایاں بیٹسمین تھے جنہوں نے 34 گیندوں پر 60 رنز کی عمدہ اننگز کھیلی، برینڈن کی اننگز میں 6 بلند و بالا چھکے اور دو چوکے شامل تھے۔

جارج مونے 35 رنز بنا کر آؤٹ ہوئے، میتھیو کراس 18 رنز بنا سکے، جبکہ اسکاٹ لینڈ کے کپتان رچی بیرنگٹن نے ذمہ دارانہ انداز میں کھیلتے ہوئے 42 رنز کی ناقابل شکست اننگز کھیلی۔

آسٹریلیا کے لیگ اسپنر ایڈم زمپا اس میچ میں صرف ایک ہی وکٹ لے سکے، ناتھن ایلس اور ایشٹن ایگر نے بھی 1،1 کھلاڑی کو آؤٹ کیا۔

کینگروز آف اسپنر گلین میکسویل نے 2 وکٹیں حاصل کیں۔

واضح رہے کہ گروپ بی سے آسٹریلیا پہلے ہی سپر 8 مرحلے کیلئے کوالیفائی کرچکا ہے۔

آسٹریلیا میگا ایونٹ کے گروپ بی میں 6 پوائنٹس کے ساتھ سرفہرست ہے، اور وہ پہلے سپر 8 مرحلے کے لیے کوالیفائی کر چکا ہے جبکہ انگلینڈ اور اسکاٹ لینڈ 5،5 پوائنٹس کے ساتھ دوسرے اور تیسرے نمبر پر ہے۔