لاہور میں گیس سلنڈر کی دکان میں خوفناک دھماکوں سے آتشزدگی

لاہور(اُمت نیوز) ملتان روڈ پر واقع گیس سلنڈر کی دکان میں ہونے والے دھماکوں کے بعد لگنے والی آگ پر قابو پا لیا گیا ہے۔
ریسکیو 1122 اور پولیس کی بھاری نفری نے جائے حادثہ پر پہنچ کر آگ بجھانے کا عمل شروع کیا۔

ریسکیو ذرائع کا کہنا ہے کہ گیس سلنڈر میں دھماکے سے لگنے والی آگ نے پوری دکان کو اپنی لپیٹ میں لے لیا، جس کے بعد دیگر گیس سلنڈرز بھی دھماکے سے پھٹ پڑے۔

عینی شاہدین کے مطابق یکے بعد دیگرے دھماکوں کی آوازیں سنی گئی۔ دھماکوں کی آواز سے لوگوں میں خوف و ہراس پھیل گیا

دکان میں موجود گیس سلنڈرز پھٹنے سے آگ کی شدت مزید بڑھ گئی تھی، جس پر ریسکیو 1122 نے پیشہ ورانہ مہارت سے قابو پایا۔

ریسکیو 1122 کے مطابق گیس سلنڈر دکان کی آتشزدگی کنٹرول میں ہے جبکہ کولنگ کا عمل ابھی جاری ہے۔

ڈی سی کمشنر لاہور رافیہ حیدر نے موقع پر پہنچ کر ریسکیو کے عمل کی نگرانی کی اور جائے حادثہ کے اطراف حفاظتی اقدامات کی ہدایت کی۔

ڈپٹی کمشنر کا کہنا تھا کہ مرکزی ملتان روڈ پر جناح ٹرمینل کے مخالف سمت سڑک پر پڑے سلنڈرز دھماکے سے پھٹے ہیں۔

واقعے میں 3 افراد زخمی ہوئے ہیں، جنہیں علاج کے لیے اسپتال منتقل کر دیا گیا ہے، آگ سے چند رکشوں کو بھی نقصان پہنچا۔

ڈی سی کے مطابق تمام ایریا کو سیکیورٹی اسکین کیا گیا، واقعہ کی ہر لحاظ سے تحقیقات کر کے مزید رپورٹ جاری کر دی جائے گی۔