بھارت نے جنوبی افریقہ کو ہرا کر دوسری بار ٹی 20 ورلڈ کپ جیت لیا

بارباڈوس(اُمت نیوز)بھارت نے جنوبی افریقہ کو 7 رنز سے شکست دے کر دوسری مرتبہ ٹی 20 ورلڈ کپ کا ٹائٹل اپنے نام کرلیا۔

بارباڈوس میں کھیلے گئے ٹی 20 ورلڈ کپ کے فائنل میں بھارت کی جانب سے دیے گئے 177 رنز کے تعاقب میں جنوبی افریقہ کی ٹیم 8 وکٹوں کے نقصان پر 169 رنز بناسکی۔

بھارت نے پہلے بیٹنگ کرتے ہوئے مقررہ اوورز میں 7 وکٹوں کے نقصان پر 176 رنز بنائے تھے اور جنوبی افریقہ کو جیت کے لیے 177 رنز کا ہدف دیا تھا۔
ویرات کوہلی نے 59 گیندوں پر 76 رنز کی شاندار اننگز کھیلی، ان کی اننگز میں 6 چوکے اور دو چھکے شامل تھے، اکشر پٹیل 47 رنز کے ساتھ نمایاں رہے۔
شیوم دوبے 27 رنز بنا کر آؤٹ ہوئے، کپتان روہت شرما 9 رنز بنا کر پویلین لوٹ گئے، رشبھ پنت بغیر کوئی رن بنائے آؤٹ ہوئے، سوریا کمار یادیو 3 رنز پر ربادا کا نشانہ بنے۔
رویندرا جڈیجا 2 رنز بنا کر نورکیانے کو وکٹ دے بیٹھے، ہاردک پانڈیا 5 رنز کے ساتھ ناٹ آؤٹ رہے۔
جنوبی افریقہ کی جانب سے کیشو مہاراج اور اینرک نورکیانے نے دو، دو وکٹیں حاصل کیں، مارکو جینسن اور کگیسو ربادا ایک، ایک وکٹ حاصل کرسکے۔
اس سے قبل بھارتی کپتان روہت شرما نے ٹاس جیت کر ایڈن مارکرم الیون کو پہلے بولنگ کی دعوت دی تھی۔

روہت شرما کا کہنا تھا کہ ٹیم میں کوئی تبدیلی نہیں کی گئی ہے، پچ دیکھنے میں اچھی لگ رہی ہے، یہاں ایک میچ کھیل چکے ہیں، کنڈیشن کا اندازہ ہے، ٹیم کو یہی پیغام ہے اچھی کرکٹ کھیلیں، امید ہے زبردست مقابلہ ہوگا۔

جنوبی افریقی کپتان ایڈن مارکرم نے کہا کہ ٹاس جیتتے تو ہم بھی بیٹنگ ہی کرتے، پوری ٹیم پراعتماد ہے کہ ٹرافی جیتیں گے۔

ایڈن مارکرم کا کہنا تھا کہ ٹیم میں کوئی تبدیلی نہیں کی گئی ہے کوشش کریں بہترین کھیل پیش کریں۔

واضح رہے کہ جنوبی افریقہ نے افغانستان کو شکست دے کر فائنل میں رسائی حاصل کی جبکہ بھارتی ٹیم انگلینڈ کو شکست دے کر فائنل میں پہنچی ہے۔