فرانس کا پاکستان میں سرمایہ کاری میں دلچسپی کا اظہار

اسلام آباد(اُمت نیوز)فرانس نے پاکستان کے مختلف شعبوں میں سرمایہ کاری اور کاروباری سرگرمیوں میں دلچسپی کا اظہار کردیا ہے۔

وفاقی وزیر نجکاری و سرمایہ کاری بورڈ اور مواصلات عبدالعلیم خان سے پاکستان میں فرانس کے سفیر نکولس گیلے کی ملاقات ہوئی جس میں باہمی دلچسپی کے مختلف امور اور ملکی معاشی معاملات پر تبادلہ خیال کیا گیا۔

ملاقات میں فرانس کے سفیر نکولس گیلے نے وفاقی وزیر عبدالعلیم خان سے نیشنل ڈے کے استقبالیے میں شرکت پر اظہار تشکر کیا اور دو طرفہ تعاون کے امور پر بھی بات چیت کی۔

اس کے علاوہ ملاقات کے دوران پاکستان اور فرانس کے مابین دو طرفہ تجارت میں اضافے کے لئے مختلف تجاویز پر بھی بات چیت ہوئی۔

دوران ملاقات فرانس کی طرف سے پاکستان کے لئے مختلف شعبوں میں دلچسپی کا اظہار کیا گیا اور مشترکہ کوششوں پر بھی گفتگو کی گئی۔

اس موقع پر وفاقی وزیر عبدالعلیم خان نے گفتگو کرتے ہوئے کہا کہ سرمایہ کاری و معاشی لحاظ سے یورپی ممالک انتہائی اہمیت کے حامل ہیں، ملکی معیشت کی مضبوطی کے لئے خسارے والے اداروں کی نجکاری کر رہے ہیں۔

انکا کہنا تھا کہ پرائیوٹائز ہونے والے سارے اداروں میں منافع کمانے اور بہتر کام کرنے کی صلاحیت ہے، کراچی سے سکھر موٹر وے اولین ترجیح ہے تا کہ پشاور تک روڈ نیٹ ورک مکمل ہو سکے، تجارت کے فروغ کے لئے چین اور وسط ایشیائی ممالک تک روڈ نیٹ ورک مکمل کریں گے۔

دوسری جانب نکولس گیلے نے گفتگو کرتے ہوئے کہا کہ جدید ٹیکنالوجی، دفاعی پیداوار اور آئی ٹی میں بھی فرانس کی مہارت سے فائدہ اٹھا سکتے ہیں۔

فرانسیسی سفیر نکولس گیلے نے پاکستان میں مختلف شعبوں میں سرمایہ کاری اور کاروباری سرگرمیوں میں دلچسپی کا اظہار کرتے ہوئے کہا کہ پاکستان میں قیام خوشگوار ہے، یہاں کی مہمان نوازی سے لطف اندوز ہو رہا ہوں۔

بعدازاں وفاقی وزیر سرمایہ کاری عبدالعلیم خان نے فرانسیسی کمپنیوں کو مختلف شعبوں میں سرمایہ کاری اور دو طرفہ تجارت کی دعوت دی جبکہ نکولس گیلے نے بھی عبدالعلیم خان کو فرانس کے دورے اور بزنس ایسوسی ایشن سے ملاقات کی دعوت دی۔