دوسرے ٹیسٹ میں طلبا کا داخلہ مفت کر دیا گیا

راولپنڈی: پاکستان کرکٹ بورڈ (پی سی بی) نے بنگلادیش کیخلاف دوسرے ٹیسٹ میچ کیلیے طلبا کا داخلہ مفت کردیا۔

بورڈ کی جانب سے جاری کردہ اعلامیے میں کہا گیا ہے کہ اسٹیڈیم میں داخلے کیلیے طلبا کو یونیفارم لازمی پہننا ہوگا جبکہ تعلیمی ادارے کا کارڈ ہونا بھی لازمی شرط ہے۔

طلبا کیلئے کسی بھی وی آئی پی انکلوژرز(عمران خان اور جاوید میانداد) میں داخلہ سیٹوں کی دستیابی سے مشروط سے ہوگی جبکہ پریمیم انکلوژرز (میراں بخش، شعیب اختر، سہیل تنویر اور یاسر عرفات) سے میچ دیکھ سکیں گے۔

طلبا کیلیے مفت داخلے کی پالیسی کا اطلاق پی سی بی گیلری یا پلاٹینم باکس میں نہیں ہوگا۔

دوسری جانب پہلے ٹیسٹ کی طرح دوسرے میچ میں بھی شائقین کیلیے مفت شٹل بس سروس کی سہولت بحال رہے گی۔