ایف بی آر ہدف حاصل کرنے میں ناکام، 101 ارب کا شارٹ فال

 

اسلام آباد( اُمت نیوز) رواں مالی سال کی پہلی سہ ماہی میں ایف بی آر ٹیکس وصولیوں کا ہدف حاصل نہیں کر سکا، جس کی وجہ سے 101 ارب روپے کے ریونیو شارٹ فال کا سامنا ہے۔

دریں اثنا فیڈرل بورڈ آف ریونیو(ایف بی آر)نہ صرف گزشتہ ماہ(ستمبر2024) کے لیے مقرر کردہ ٹیکس وصولیوں کا ہدف حاصل کرنے میں کامیاب ہوگیا ہے بلکہ مقررہ ہدف سے بھی 11 ارب روپے زائد ٹیکس وصولیاں کرلی گئی ہیں۔ تاہم رواں مالی سال 2024-25 کی پہلی سہ ماہی(جولائی تا ستمبر2024)کے لیے مقرر کردہ ہدف حاصل نہیں ہوسکا، جس کی وجہ سے 101ارب روپے کے ریونیو شارٹ فال کا سامنا ہے۔

اہم بات یہ ہے کہ ستمبر میں حاصل ہونے والی ہدف سے زیادہ وصولیوں کے باعث پہلے 2 ماہ کے ریونیو شارٹ فال میں 11 ارب روپے کی کمی واقع ہوئی ہے۔

فیڈرل بورڈ آف ریونیو کوٹیکس دہندگان کی جانب سےرات گئے تک مجموعی طور پر 36لاکھ 38 ہزار216 انکم ٹیکس گوشوارے موصول ہوچکے ہیں۔ ان گوشواروں کے ساتھ ایف بی آر کو مجموعی طور پر 95ارب روپے کا ریونیو حاصل ہوا ہے۔ فیڈرل بورڈ آف ریونیو کے سینئر افسر کی رات گئے ایکسپریس سے ٹیلی فونک گفتگو ہوئی، جس میں انہوں نے بتایا کہ فیڈرل بورڈ آف ریونیو نے ستمبر 2024 میں مجموعی طور پر 996ارب روپے کی خالص عبوری ٹیکس وصولیاں کی ہیں ، جو کہ 985 ارب روپے کے مقررہ ہدف سے 11 ارب روپے زیادہ ہیں۔

انہوں نے بتایا کہ اسی طرح ایف بی آر نے رواں مالی سال 2024-25کی پہلی سہ ماہی(جولائی تا ستمبر2024) میں مجموعی طور پر 2438ارب روپے کی عبوری خالص ٹیکس وصولیاں کی ہیں جو کہ 2539ارب روپے کے مقررہ ہدف سے 101ارب روپے کم ہیں۔

مذکورہ افسر کا کہنا ہے کہ رواں مالی سال کے پہلے 2 ماہ(جولائی،اگست) میں ایف بی آر کو مجموعی طور پر 112ارب روپے کے ریونیو شارٹ فال کا سامنا تھا کیونکہ پہلے 2 ماہ میں ایف بی آر نے 1554ارب روپے ہدف کے مقابلے میں 1442ارب روپے کی خالص ٹیکس وصولیاں کی تھیں لیکن ستمبر2024 میں چونکہ ٹیکس وصولیاں مقررہ ہدف سے 11 ارب روپے زیادہ رہی ہیں اس لیے پہلی سہ ماہی میں ایف بی آر کا ریونیو شارٹ فال بھی کم ہوکر 101ارب روپے رہ گیا ہے ۔

انہوں نے مزید بتایا کہ ایف بی آر کو پیر کی رات 12 بجے تک ٹیکس دہندگان کی جانب سے مجموعی طور پر 36لاکھ38ہزار216 انکم ٹیکس گوشوارے موصول ہوئے ہیں جب کہ گزشتہ مالی سال2023-24کے اس عرصے میں ایف بی آر کو 19لاکھ 56 ہزار 602 انکم ٹیکس گوشوارے موصول ہوئے تھے۔

اس لحاظ سے اب تک موصول ہونے والے گوشوارے پچھلے مالی سال کے اسی عرصے کے مقابلے میں دوگنا ہیں ۔ گزشتہ مالی سال مجموعی طور 62 لاکھ 36ہزار انکم ٹیکس گوشوارے موصول ہوئے تھے۔ ان گوشواروں کے ساتھ ایف بی آر کو مجموعی طور پر 48ارب20کروڑ 90 لاکھ روپے کا ریونیو آیا تھا جبکہ اس سال اب تک وصول ہونے والے 36لاکھ38ہزار216 انکم ٹیکس گوشواروں کے ساتھ 95 ارب روپے کا ریونیو حاصل ہوا ہے جبکہ ایف بی آر کو توقع ہے کہ اس سال انکم ٹیکس گوشوارے جمع کروانے والوں کی تعداد 70 لاکھ سے تجاوز کر جائے گی۔