کے پی ہاؤس میں چھاپا مارنا افسوسناک ہے، اسد قیصر

اسلام آباد(اُمت نیوز)پاکستان تحریک انصاف (پی ٹی آئی) کے رہنما اسد قیصر نے کہا ہے کہ کے پی ہاؤس میں رینجرز نے چھاپا مارا، یہ قابل افسوس اور قابل مذمت ہے۔

انہوں نے کہا کہ ہمارے وزیراعلیٰ کو اغواء کیا گیا، گرفتار کیا گیا، یہ پورے صوبے کی توہین ہے، فوری طور پر علی امین کو چھوڑا جائے۔

اسد قیصر کا کہنا تھا کہ حکومت آئین و قانون کاخیال نہیں رکھ رہی، حکومت صرف زور اور دباؤ کے ذریعے معاملات کو آگے بڑھانا چاہتی ہے۔

انہوں نے کہا کہ اگر آپ کاخیال ہے کہ یہ حملہ ہوا اور بس ختم ہوجائے گا تو یہ غلط فہمی ہے، اس معاملے پر کے پی اسمبلی اجلاس جلد بلا رہے ہیں۔

پی ٹی آئی رہنما کا کہنا تھا کہ علی امین کے پاس اختیار ہوگا کہ وہ اپنے فیصلے کیسے کرتے ہیں۔

انہوں نے کہا کہ ہم جرات اور ہمت کے ساتھ حالات کامقابلہ کریں گے، ہم پرُامن لوگ ہیں اور کسی طور پر اپنی حقوق پر سودے بازی نہیں کریں گے۔

اسد قیصر کا مزید کہنا تھا کہ ہم اپنے موقف سے پیچھے نہیں ہٹیں گے، ترمیم زور اور زبردستی سے پاس نہیں ہوگی۔