جوہری عدم پھیلاؤ کانفرنس 2024 کا اسلام آباد میں انعقاد

جوہری عدم پھیلاؤ کانفرنس 2024 کا اسلام آباد میں انعقاد کیا گیا۔ آئی ایس پی آر کے مطابق 2 روزہ انٹرنیشنل کانفرنس کا انعقاد اسٹریٹجک ویژن انسٹیٹیوٹ اسلام آباد میں کیا گیا۔

آئی ایس پی آر کے مطابق بین الاقوامی کانفرنس میں دنیا بھر سے اسکالرز اور ماہرین نے شرکت کی۔ کانفرنس کا مقصد عالمی اسٹریٹجک مسائل پر تعمیری بات چیت کو فروغ دینا اور پاکستان کے پالیسی نقطہ نظر کو شیئر کرنا تھا۔

آئی ایس پی آر کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا کانفرنس کے مہمان خصوصی تھے۔ کانفرنس میں پاکستان کے ممتاز پالیسی سازوں اور پریکٹیشنرز نے شرکت کی۔

آئی ایس پی آر کے مطابق جنرل ریٹائرڈ زبیر محمود حیات، لیفٹیننٹ جنرل ریٹائرڈ خالد احمد قدوائی اور مشیر نیشنل کمانڈ اتھارٹی لیفٹیننٹ جنرل سرفراز ستار نے بھی کانفرنس سے خطاب کیا۔

آئی ایس پی آر کے مطابق اعلیٰ سطح کانفرنس نے جوہری عدم پھیلاؤ کی کوششوں کیلئے پاکستان کےعزم کو تقویت بخشی۔ کانفرنس میں علاقائی و بین الاقوامی سلامتی کو برقرار رکھنے کیلئے اسٹریٹجک ڈائیلاگ کی اہمیت پر زور دیا گیا۔

آئی ایس پی آر کے مطابق کانفرنس میں انسٹیٹیوٹ آف ورلڈ اکانومی روس کی سائنس اکیڈمی اور سینٹر فار انرجی اینڈ سیکیورٹی اسٹیڈیز روس کے اسکالرز نے بھی کانفرنس میں شرکت کی۔

چائنا انسٹیٹیوٹ آف کنٹیمپریری انٹرنیشنل ریلیشنز کے اسکالرز کے علاوہ کئی بین الاقوامی یونیورسٹیوں کے اسکالرز بھی کانفرنس میں شریک ہوئے۔