ڈاکٹر ماہ رنگ بلوچ کیخلاف مقدمہ درج،دہشتگردی کی دفعات شامل

کراچی (اُمت نیوز) ڈاکٹر ماہ رنگ بلوچ کے خلاف کراچی میں مقدمہ درج کرلیا گیا، ایف آئی آر میں دہشت گردی کی دفعات شامل کی گئی ہیں۔

تفصیلات کے مطابق ڈاکٹر ماہ رنگ بلوچ کیخلاف کراچی میں جو مقدمہ درج کیا گیا ہے اس میں ملزمہ کو دہشت گرد تنظیموں کی سہولت کار ظاہر کیا گیا ہے۔

مذکورہ مقدمے میں ڈاکٹر ماہ رنگ بلوچ کیخلاف لوگوں کو اشتعال دلانے اور ورغلانے سمیت دہشت گردی کی دفعات شامل کی گئی ہیں۔

پولیس کے مطابق مقدمہ ملیر کے رہائشی ایک شخص نے تھانہ قائد آباد میں درج کرایا، جس میں الزام عائد کیا گیا ہے کہ ماہ رنگ بلوچ بلوچستان کے پڑھے لکھے نوجوانوں کو ورغلا رہی ہیں۔

پولیس کا کہنا ہے کہ یہ مقدمہ اشتعال دلانے سمیت دہشت گردی ایکٹ کے تحت درج کیا گیا ہے، ملزمہ جلوسوں اور ریلیوں کی آڑ میں دہشت گردوں کی نقل حرکت کراتی ہے۔

مقدمے کے متن سے متعلق پولیس نے بتایا کہ دہشت گرد حساس تنصیبات کی ریکی کرتے اور کارروائیاں کرتے ہیں۔