26ویں آئینی ترمیم آج سینیٹ میں پیش کی جائے گی

اسلام آباد(اُمت نیوز) حکومت کی جانب سے 26ویں آئینی ترمیم منظوری کے لیے آج سینیٹ میں پیش کی جائے گی۔

وزیر اعظم شہباز شریف کی جانب سے حکومتی اور اتحادی جماعتوں کے سینیٹرز کے اعزاز میں ظہرانہ دیا گیا جس میں سیاسی جماعتوں کے قائدین نے آئینی ترمیم پر وزیر اعظم کو اپنی حمایت کی یقین دہانی کرا دی۔

ظہرانے کے بعد مسلم لیگ ن کے پارلیمانی لیڈر سینیٹر عرفان صدیقی نے میڈیا سے گفتگو کرتے ہوئے بتایا تھا کہ سینیٹ میں آئینی ترمیم آج پیش کی جائے گی۔

سینیٹ اجلاس سے قبل وفاقی کابینہ کا اجلاس ہوگا جس میں 26ویں آئینی ترمیم کی منظوری دی جائے گی اور پھر انہیں قومی اسمبلی و سینیٹ میں پیش کیا جائے گا۔

وزارت قانون کی جانب سے سامنے آنے والے مجوزہ ڈرافٹ کے مطابق حکومت اب 56 کی جگہ 24 ترامیم کرے گی۔ آئین کے آرٹیکل 48 کی شق 4 میں ترمیم کا فیصلہ کیا ہے۔