ضلع خیبر میں پولیس اسٹیشن پر دہشتگردوں کا حملہ، ایک اہلکار شہید

پشاور: ڈسٹرکٹ پولیس آفیسر رائے مظہر اقبال کے مطابق تھانہ ملاگوری ضلع خیبر کا دور افتادہ علاقہ ہے جہاں قریبی پہاڑوں میں دہشتگردوں نے گھات لگاکر تھانہ ملاگوری کی عمارت پر فائرنگ کردی۔

ڈی پی او نے کہا کہ فائرنگ میں سنائپر گن اور خودکار اسلحہ استعمال کیا گیا جس میں ایک پولیس اہلکار ثاقب خان موقع پر شہید ہوگیا جبکہ پولیس کی جوابی فائرنگ سے دہشتگرد فرار ہوگئے۔

ڈی پی او نے بتایا کہ پولیس نے ہائی الرٹ جاری کرکے مختلف مقامات پر ناکہ بندیاں کر رکھی ہیں اور دہشتگردوں کا تعاقب جاری ہے۔

دوسری جانب بنوں کے علاقے بکا خیل میں بھی پولیس سٹیشن پر رات گئے دہشتگردوں نے حملہ کیا جس کے نتیجے میں ایک پولیس اہلکار زخمی ہوگیا اور جوابی فائرنگ کے بعد دہشت گرد فرار ہوگئے۔