لگ رہا ہے عمران خان کو ریلیف دیا جا رہا ہے، شرجیل میمن

کراچی: وزیراطلاعات سندھ شرجیل میمن نے کہا ہے کہ عمران خان کی جیل میں ملاقاتوں پر پابندی بھی ختم ہوگئی ہے اور یہ لگ رہا ہے کہ عمران خان کو ریلیف دیا جارہا ہے، عمران خان کو ملنے والے ریلیف کے پیچھے ان کی سابق اہلیہ اور سابق سالے زیک گولڈ اسمتھ کا ہاتھ ہے۔

وزیراطلاعات سندھ شرجیل میمن نے ییلولائن بی آرٹی کا دورہ کیا جہاں انہوں نے میڈیا سے گفتگو کرتے ہوئے کراچی میں 100 ارب روپے کی لاگت سے ییلو لائن بی آر ٹی بنانے کا اعلان کردیا اور کہا کہ جام صادق پل کے ساتھ دوسرا پل 18 ماہ میں مکمل ہوجائے گا، سندھ حکومت شہریوں کو سفری سہولیات فراہم کررہی ہے، شہریوں کے لیے صرف ایک منصوبے پر100 ارب خرچ کررہے ہیں، پیپلزپارٹی سندھ کی عوام کی خدمت کررہی ہے، ییلو لائن بی آرٹی منصوبہ 21 کلو میٹر پر محیط ہے۔

سینئر صوبائی وزیر شرجیل میمن نے کراچی میں مزید الیکٹرک بسیں لانے کا بھی اعلان کیا۔

شرجیل میمن نے کہا کہ ایک بات تو واضح ہے کہ عمران خان کے لیے اسرائیلی لابی سنجیدگی کے ساتھ کام کررہی ہے، جس میں گولڈ اسمتھ فیملی کا خصوصی کردار ہے، اس وقت امریکا میں بھی گولڈ اسمتھ لابی سرگرم عمل ہے، حال ہی میں امریکی قانون دانوں نے عمران خان کے حق میں دستخط کیے ہیں اور وہ عمران خان کے حق میں قرار داد لانا چاہ رہے ہیں۔

انہوں نے مزید کہا کہ یہ وہی عمران خان ہیں جو کہا کرتے تھے کہ ہم کوئی غلام ہیں، غیرملکی مداخلت نامنظور، بقول ان کے انہیں سازش کے تحت نکالا گیا اور جن ممالک پر وہ سازش کا الزام عائد کرتے تھے آج پی ٹی آئی کی قیادت انہی ممالک کے پیروں پر گری ہوئی ہے، ان کے لابسٹ اور یہودی لابی آج انہی ممالک کے پیروں پرگری ہوئی ہے کہ عمران خان اور اس کی فیملی کو ریلیف دیا جائے۔

سینئر صوبائی وزیر کا کہنا تھا کہ پیپلزپارٹی کبھی نہیں چاہتی کہ کسی کی ماں، بہن یا بیٹی جیل جائے، ہماری پوری پارٹی دل سے اس چیز کی خلاف ہے، باوجود اس کے کہ عمران خان نے بطور وزیر اعظم احکامات جاری کرکے پیپلزپارٹی کی قیادت اور فریال تالپور کو عید کی رات گھسیٹ کر جیل میں بھیجا گیا، ہم نہیں چاہتے کہ کسی اور کی فیملی کے ساتھ ایسا ہو۔

انہوں نے کہا کہ لابیزعمران خان کو ریلیف دلوانے کے لیے کام کررہی ہیں، عمران خان کی جیل میں ملاقاتوں پر پابندی بھی ختم ہوگئی ہے اور یہ لگ رہا ہے کہ عمران خان کو ریلیف دیا جارہا ہے، انہوں نے کہاکہ عمران خان کو ملنے والے ریلیف کے پیچھے ان کی سابقہ اہلیہ اور سابق سالے زیک گولڈ اسمتھ کا ہاتھ ہے، جو پوری دنیا میں یہ لابنگ کررہے ہیں کہ جیسے وہ بہت بڑا قومی ہیرو تھا جس کے ساتھ کوئی ظلم ہوا ہے، حالانکہ قطعاً ایسا نہیں ہے۔

شرجیل میمن نے مزید کہاکہ جو اسرائیل آج فلسطین، لبنان اور ایران پر حملے کررہا ہے، وہی اسرائیل آج عمران خان کو بچانے کے لیے محنت کررہا ہے، ان ساری چیزوں کا پس منظر دیکھا جائے تو ڈاکٹر اسرار احمد کا وہ خطاب صحیح ثابت ہورہا ہے کہ عمران خان اسرائیلی لابی کی جانب سے ہم پر مسلط کیا گیا ہے۔

27 ویں آئینی ترمیم پر مولانا فضل الرحمٰن کے جارحانہ موقف سے متعلق سوال پر وزیر اطلاعات سندھ نے کہا کہ مولانا فضل الرحمٰن کی سب سے بڑی خوبی یہ ہے کہ وہ کبھی بھی فل اسٹاپ نہیں لگاتے، وہ بات چیت کے دروازے بند نہیں کرتے، وہ مذاکرات پر یقین رکھتے ہیں، اگر کوئی خامی رہ ہوگئی ہوگی تو بھی مولانا صاحب سے بات چیت ہوسکتی ہے۔

ایک سوال کے جواب میں شرجیل میمن نے کہا کہ پاکستان کا آئینی ادارہ الیکشن کمیشن فارن فنڈنگ کیس کے فیصلے میں لکھتا ہے کہ عمران خان کی پی ٹی آئی کو 2018 کے الیکشن میں بھارت اور اسرائیل سے فنڈنگ ہوئی، الیکشن کمیشن کے فیصلے میں اکاؤنٹس اور پیسے بھیجنے والے کی تفصیل بھی شامل ہے، شہید ارشد شریف نے بھی اپنے پروگرام میں بتایا کہ اسرائیلی شخص نے عمران خان کے اکاؤنٹس میں پیسے ڈالے۔

انہوں نے مزید کہا کہ جو اسرائیل فلسطین، لبنان اورایران میں حملے اور نسل کشی کررہا ہے، انسانوں کے وجود کو ختم کررہا ہے،اسے کہیں انسانی حقوق کی پامالی نظرنہیں آتی لیکن عمران خان کی گرفتاری پرایک بین الاقوامی کانفرنس میں اسرائیل کا نمائندہ کہتا ہے کہ پاکستان میں انسانی حقوق پامال ہورہے ہیں۔

سینئر صوبائی وزیر کا کہنا تھا کہ اگرعمران خان کی گرفتاری پراسرائیل کی چیخیں نکل رہی ہیں تو اس کا مطلب ہے کہ یہ ان کا پودا ہے ، یہ ان کا بے بی ہے، یہ ان کی پروڈکٹ ہے، یہ پاکستان میں ان کا پیدا کیا ہوا فتنہ ہے، کیونکہ انہیں پتہ ہے کہ پاکستان کو شہید ذوالفقار علی بھٹو نے ایٹمی طاقت بنایا ہوا ہے اس لیے اس سے ایسے نہیں لڑا جاسکتا۔

شرجیل میمن نے کہا کہ اسرائیل کو پتہ ہے کہ پاکستان سے لڑنے کے لیے یہاں پر فتنہ اور فساد ہونا چاہیے، یہاں ایسا پودا اگایا جائے جو ملک کو اندرونی طور پرکھوکھلا کرے، اس لیے عمران خان کولانچ کیا گیا۔

انہوں نے کہاکہ عمران خان پاکستان کے خلاف اسرائیل کا ایٹمی ہتھیار ہے جو اس وقت گرفت میں ہے اوراس کو ریلیف دینا اسرائیلی مقاصد کو پورا کرنے کے مترادف ہے۔