خیبرپختونخوا میں دو مختلف کارروائیوں کے دوران 4 خوارج ہلاک

راولپنڈی: پاک فوج کے شعبہ تعلقات عامہ (آئی ایس پی آر) کے مطابق 24 اور 27 اکتوبر کو 2 مختلف آپریشنز میں 4 خوارج مارے گئے۔

آئی ایس پی آر کے مطابق سکیورٹی فورسز نے خوارج کی موجودگی کی اطلاع پر شمالی وزیرستان اور ضلع خیبر میں انٹیلیجنس بیسڈ آپریشن کیا۔

شمالی وزیرستان میں کارروائی کے دوران شدید فائرنگ کے تبادلے میں خارجی انصاف اللہ سمیت 2 خوارج ہلاک ہوگئے جبکہ ضلع خیبر آپریشن کے دوران 2 خوارج ہلاک اور 3 کو زخمی حالت میں گرفتار کرلیا گیا۔ آپریشن کے دوران بھاری مقدار میں ہتھیار اور گولیاں برآمد کی گئیں۔

آئی ایس پی آر کے بیان میں کہا گیا کہ ہلاک خوارج سیکیورٹی فورسزکے خلاف دہشت گردی کی متعدد کارروائیوں میں ملوث تھے، مارے گئے خوارج معصوم شہریوں کے اغوا اور ٹارگٹ کلنگ میں بھی ملوث تھے۔

آئی ایس پی آرکے بیان میں یہ بھی کہا گیا ہے کہ علاقے میں پائے جانے والے مزید کسی خوارجی کے خاتمے کے لیے کلیئرنس آپریشن جاری ہے، پاک فوج اور سکیورٹی فورسز ملک سے دہشت گردی کے خاتمے کے لیے پرعزم ہیں۔