190 ملین پاؤنڈز کیس، عمران خان اور بشریٰ بی بی کو پیر تک جواب داخل کرنے کی ہدایت

راولپنڈی:190 ملین پاؤنڈز کیس میں عدالت نے عمران خان اور بشریٰ بی بی کو پیر تک جواب داخل کرنے کی ہدایت کردی۔

بانی چیئرمین پی ٹی آئی عمران خان اور ان کی اہلیہ بشریٰ بی بی کے خلاف 190 ملین پاؤنڈز ریفرنس کی سماعت احتساب عدالت کے جج ناصر جاوید رانا نے اڈیالہ جیل میں کی۔

ملزمان کی جانب سے آج بھی عدالت میں 342 کے سوال ناموں پر جواب داخل نہیں کروائے گئے۔

دورانِ سماعت وکلائے صفائی نے تحریری درخواست کی کہ اسلام آباد ہائی کورٹ نے زبانی کہا ہے کہ درخواست بریت سے قبل عدالت کوئی کارروائی نہیں کرے گی۔

نیب کے وکلا نے مؤقف اختیار کیا کہ درخواست پر ہائی کورٹ میں دلائل دینے والے وکلا کے دستخط موجود نہیں۔ وکلائے صفائی نے تحریری درخواست دی ہے اس لیے درخواست پر اعتراض نہیں۔ ہائی کورٹ میں ہماری موجودگی کے دوران کوئی ایسا زبانی حکم نہیں دیا گیا۔

بعد ازاں احتساب عدالت نے 190  ملین پاؤنڈز ریفرنس کی سماعت پیر تک ملتوی کر دی  اور ملزمان کو سوال ناموں کے جواب پیر کو داخل کرانے کی ہدایت کردی۔ آج ہونے والی سماعت میں بانی چیئرمین پی ٹی آئی عمران خان کو عدالت میں پیش کیا گیا، تاہم بشریٰ بی بی حاضر نہیں ہوئیں۔

بشریٰ بی بی کی طبی بنیادوں پر ایک روزہ حاضری سے استثنا کی دائر درخواست منظور کر لی گئی۔