پاکستان، زمبابوے کے درمیان پہلاٹی20 آج کھیلا جائے گا

زمبابوے(اُمت نیوز)پاکستان اور زمبابوے کے درمیان کوئنز کلب میں پہلا ٹی20 آج کھیلا جائے گا۔

زمبابوے کے خلاف ون ڈے سیریز جیتنے کے بعد پاکستان کی نسبتاً کم تجربہ کار ٹیم سلمان علی آغا کی قیادت میں آج سے زمبابوے کے خلاف ٹی 20 کا آغاز کرے گی۔میچ پاکستانی وقت کے مطابق شام چار بجے شروع ہوگا۔

سلمان علی آغا دوسری بار پاکستان کی قیادت کررہے ہیں جبکہ عمیر بن یوسف اپنے انٹرنیشنل کیریئر کا آغاز کریں گے،بابر اعظم، شاہین شاہ، نسیم شاہ، عبداللّٰہ شفیق، کامران غلام اور فیصل اکرم ٹیم میں شامل نہیں۔

قومی سلیکشن کمیٹی نےصائم ایوب، عامر جمال اور ابرار احمد کو ٹی20 سکواڈ کا حصہ بنا لیا ہے۔زمبابوے کے خلاف تین ٹی ٹوئنٹی میچز کی سیریز کے لیے پاکستان کا اسکواڈ 17کھلاڑیوں پر مشتمل ہے۔

پاکستان نے آج کے میچ کے لئے اپنی پلیئنگ الیون کا اعلان کردیا ہے، کپتان سلمان آغا کے علاوہ صائم ایوب، عمیر بن یوسف، عثمان خان، طیب طاہر، عرفان خان، جہانداد خان، عباس آفریدی، حارث رؤف، ابرار احمد اور سفیان مقیم شامل ہیں۔