کچھ ایسے لوگ ہیں جو خواتین کی ترقی نہیں چاہتے، بلاول بھٹو

کراچی: چیئرمین پیپلز پارٹی بلاول بھٹو زرداری نے کہا ہے کہ ہمارے یہاں اور ہمسائے ملک میں کچھ ایسے لوگ موجود ہیں جو خواتین کی ترقی نہیں چاہتے۔

لیاری میں پنک فٹ بال ٹورنامنٹ کے افتتاح کی تقریب سے خطاب میں بلاول بھٹو زرداری نے کہا کہ وہ دن دور نہیں جب سندھ کی فٹبالرز بین الاقوامی سطح پر نمائندگی کریں گی اور دنیا میں خواتین کو آگے بڑھانے میں اپنا بھرپور کردار ادا کریں گی۔

انہوں ںے کہا کہ کچھ ایسی سوچ والے لوگ ہمارے اپنے ملک، ہمارے ہمسائے ملک میں موجود ہیں جو خواتین کو ترقی کرتا نہیں دیکھنا چاہتے ان کے لیے جواب یہ ویمن فٹبال ٹیم ہے، ہم ثابت کریں گے سندھ کی خواتین پاکستان اور دنیا میں اہم کردار ادا کریں گی،

بلاول بھٹو نے کہا کہ بہت خوش ہوں لیاری میں بین الاقوامی معیار کےگراؤنڈ موجود ہوں، صوبے بھر کے نوجوان کھلاڑی فٹبال کھیلنے یہاں آئے ہیں، خواتین ملک کی وزیراعظم بننا چاہیں تو ایک نہیں دو بار بن سکتی ہیں۔

انھوں نے کہا کہ ملک میں ایسی سوچ والے لوگ ہیں جو نوجوانوں کے مستقبل کو تباہ کرنا چاہتے ہیں، میں نوجوانوں کو ترقی کرتے ہوئے دیکھنا چاہتا ہوں، بہت سے مسائل ہیں، بہت شعبوں میں کام کی بھی گنجائش ہے۔

بلاول بھٹو نے کہا کہ وزیر اعلیٰ پورے کراچی پر توجہ دے رہے ہیں، تاریخ میں پہلی بار ایک جیالا میئر سامنے کھڑا ہے، شہید بے نظیر بھٹو نے لیاری کے عوام کی خدمت کی،  سندھ، لیاری اور پاکستان کے نوجوانوں کو آگے بڑھتا دیکھنا چاہتے ہیں۔

قبل ازیں تقریب سے وزیراعلیٰ سندھ مراد علی شاہ نے بھی خطاب کیا۔