اداکارہ عائشہ آفریدی کا شاہد آفریدی سے کیا رشتہ؟

کراچی: شوبز انڈسٹری کی ابھرتی اداکارہ عائشہ آفریدی نے بتایا ہے کہ ان کا سابق کپتان شاہد آفریدی سے کیا رشتہ ہے۔

اے آر وائی ڈیجیٹل کے بلاک بسٹرڈرامہ سیریل ’بے بی باجی کی بہوئیں‘ سے شہرت کی بلندیوں کو چھونے والی اداکارہ عائشہ آفریدی نے ایک شو میں شرکت کی اور مختلف موضوعات پر کھل کر گفتگو کی۔

شاہد آفریدی سے رشتہ داری کے حوالے سے عائشہ آفریدی نے کہا کہ مجھ سے سب پوچھتے ہیں کہ آپ کا شاہد آفریدی سے کوئی رشتہ ہے، مجھے کمنٹس بھی آتے ہیں۔ حقیقت میں میرا ان سے کوئی رشتہ نہیں، میں عائشہ آفریدی ہی ہوں۔

ان کا کہنا ہے کہ ڈراموں میں کام کرنے کے بعد بھی گھر والوں کا کوئی خاص رسپانس نہیں ہے لیکن وہ مجھ پر فخرکرتے ہیں۔

اداکارہ نے کہا کہ ’بے بی باجی کی بہوئیں‘ میں اداکاری کرنے کا تجربہ بہت اچھا رہا، ٹیم بہت اچھی ہے، میں نے کمرشل سے اپنے کیریئر کا آغاز کیا تھا۔ اب ڈراموں کی آفرزہوتی ہیں تو اچھا لگتا ہے۔

عائشہ آفریدی نے کہا کہ میرا بچپن سے یہی خواب تھا کہ اداکارہ بنوں اب یہ خواب پورا ہوگیا ہے تو میں بہت خوش ہوں۔ بچپن میں ٹیچر اور دوستیں پوچھتی تھیں کہ کیا بننا چاہتی ہو تو میں کہتی تھی کہ اداکارہ بنوں گی جبکہ فیملی میں سے کسی کا شوبز سے تعلق نہیں ہے، شوبز میں آنے کے لیے مجھے فیملی کو منانا پڑا تھا۔

انہوں نے بتایا کہ میں جہاں بھی جاتی ہوں والدہ میرے ساتھ ہوتی ہیں، وہ کہتی ہیں کہ چھوٹی ہو کوئی بھی آسانی سے بیوقوف بنا سکتا۔