پارہ چنار واقعے پر کراچی میں دھرنے جاری، ٹریفک کی روانی شدید متاثر

کراچی: شہر قائد میں پاراچنار واقعے کے خلاف مذہبی جماعت کی جانب سے شہر کے مختلف مقامات پر گزشتہ رات سے احتجاجی دھرنے جاری ہیں، جس کے باعث شہریوں کو شدید مشکلات کا سامنا کرنا پڑ رہا ہے۔

ٹریفک پولیس کے مطابق صرف مین شاہراہ فیصل کو کالا چھپرا کی طرف ٹریفک کے لیے کھول دیا گیا ہے۔

ابوالحسن اصفہانی روڈ عباسی ٹاؤن، یونیورسٹی روڈ سماما شاپنگ سینٹر، اور نارتھ ناظم آباد فائیو اسٹار چورنگی پر دھرنے جاری ہیں۔

نیشنل ہائی وے ملیر 15 برج، ناصر جمپ کورنگی، نمائش چورنگی،  اور شارع فیصل چھوٹا گیٹ سے قائدآباد جانے والے راستوں اور دیگر مقامات پر بھی دھرنے جاری ہیں۔

رات بھران دھرنوں کے باعث شہریوں کو آمدورفت میں شدید مشکلات کا سامنا کرنا پڑا۔

مظاہروں کے باعث متعدد مرکزی شاہراہیں بند ہیں جبکہ کئی شاہراؤں ٹریفک بحال کرائی جا چکی ہے۔

تازہ اطلاعات کے مطابق کراچی کے علاقوں گرومندر، لسبیلہ، پٹیل پاڑہ، گولیمارچورنگی، تین ہٹی، لیاقت آباد، ڈاکخانہ کے مقام پر ٹریفک رواں دواں ہے۔

علاوہ ازیں کریم آباد، عائشہ منزل، واٹرپمپ اور سہراب گوٹھ پر ٹریفک معمول پر ہے جبکہ گلشن اقبال، نیپاچورنگی، سمامہ پر ٹریفک جزوی بحال ہے۔ اسی طرح گلستان جوہرچورنگی، جوہرموڑ اور ڈرگ روڈ پر ٹریفک تقریباً بحال ہوگیا ہے۔

ٹریفک پولیس کا کہنا ہے کہ متاثرہ مقامات پر متبادل راستوں کا انتظام کیا جا رہا ہے، اور شہریوں سے درخواست ہے کہ سروس روڈ اور دیگر متبادل راستے اختیار کریں تاکہ کسی بھی پریشانی سے بچ سکیں۔

اطلاعات کے مطابق دھرنے کی صورتحال کے پیش نظر پولیس اور دیگر ادارے ٹریفک کی روانی کو بحال رکھنے کے لیے سرگرم ہیں۔

ذرائع کے مطابق شہریوں سے اپیل کی گئی ہے کہ وہ سفر سے پہلے صورتحال کا جائزہ لیں اور ٹریفک پولیس کی ہدایات پر عمل کریں۔