آذربائیجان کا روس سے طیارے حادثے پر معافی مانگنے کا مطالبہ

 

آذربائیجان نے روس سے قازقستان میں طیارے حادثے پر معافی مانگنے کا مطالبہ کر لیا۔

آذربائیجان کے رکن پارلیمنٹ راسم موسی بیوف نے کہا ہے کہ روس کو طیارے حادثے کی ذمے داری قبول کرنی چاہیے۔

راسم موسی بیوف کاکہنا ہے کہ ذمے داروں کے خلاف قانونی کارروائی اور متاثرین کو معاوضے کا اعلان کرنا چاہیے۔

دوسری جانب کریملن کے ترجمان دیمتری پیسکوف کا کہنا ہے کہ طیارے حادثے کی تحقیقات جاری ہیں، جب تک تحقیقات مکمل نہیں ہوتیں کسی قسم کا تبصرہ نہیں کر سکتے۔

دیمتری پیسکوف نے کہا کہ ہمارے پاس ایوی ایشن حکام ہیں جو تحقیقات کر سکتے ہیں، معلومات صرف روسی ایوی ایشن حکام کی طرف سے آسکتی ہیں۔

طیارے میں چیچنیا کے نیکولیوسکوئی گاؤں کے قریب پھنس کر رہ گیا تھا، ابتدائی طور پر پائلٹوں کا خیال تھا کہ پرندا ٹکرانے سے طیارے کو نقصان پہنچا ہے، بعد میں فلائٹ کمانڈر نے بتایا کہ گروزنی میں کارپٹ پلان کی اطلاع دی گئی تھی۔

میڈیا رپورٹ کے مطابق کارپٹ پلان ایمرجنسی کی صورت میں فضائی حدود بند کرنے کا پروٹوکول ہے، تب تک طیارے میں خرابی کی اطلاع اور رخ تبدیلی کرنے کی درخواست کی جا چکی تھی۔

سربراہ روسی فیڈرل ایئر ٹرانسپورٹ ایجنسی کا کہنا ہے کہ حادثے کے روز گروزنی میں پیچیدہ صورتِ حال تھی، یوکرین کے لڑاکا ڈرون گروزنی اور ویلادیکاوکاز پر حملے کر رہے تھے۔

واضح رہے کہ آذربائیجان ایئر لائن کا مسافر طیارہ 25 دسمبر کو قزاق شہر اکتاو میں گر کر تباہ ہو گیا تھا، طیارہ آذربائیجان کے شہرباکو سے چیچنیا کے شہر گروزنی جا رہا تھا۔

حادثے کا شکار ہونے والے طیارے میں عملے سمیت 67 افراد موجود تھے جن میں 39 ہلاک ہو گئے تھے جبکہ 28 افراد زخمی ہوئے تھے۔