کراچی: تعلیمی اداروں میں منشیات سپلائی کرنیوالا ملزم گرفتار

 

اینٹی نارکوٹکس فورس (اے این ایف) نے منشیات سپلائی کے خلاف تعلیمی اداروں اور ملک کے مختلف شہروں میں 10 کارروائیوں کے دوران 9 ملزمان کو گرفتار کر کے ان کے قبضے سے1231 کلو گرام منشیات برآمد کر لی۔

برآمد شدہ منشیات کی مالیت 22 کروڑ بتائی گئی ہے۔

اے این ایف کے ترجمان کے مطابق کراچی میں کورنگی روڈ پر موٹر سائیکل سوار سے 250 گرام ہیروئن برآمد ہوئی۔

گرفتار ملزم نے کراچی کے تعلیمی اداروں کے طلباء کو منشیات فروخت کرنے کا اعتراف کیا ہے۔

لاہور انٹرنیشنل ایئرپورٹ پر بحرین جانے والے مسافر کے پیٹ سے40 ہیروئن سے بھرے کیپسول برآمد کر لیے گئے۔

ایم ون انٹرچینج اسلام آباد کے قریب گاڑی میں چھپائی گئی 8.4 کلو چرس برآمد کر کے ملزم کو گرفتار کر لیا گیا۔

ڈسکہ چوک سیالکوٹ کےقریب ملزم کے قبضے سے 3 کلو ہیروئن، 2 کلو آئس، 1.2 کلو چرس برآمد کر لی گئی۔

اٹک میں بھی برہان ٹول پلازہ کے قریب ملزم کے قبضے سے 700 کلو چرس برآمد کی گئی۔

ترجمان اے این ایف کے مطابق گرفتار ملزمان کے خلاف انسدادِ منشیات ایکٹ کے تحت مقدمہ درج کر کے تحقیقات کا آغاز کر دیا گیا ہے۔