100 سالہ تاریخ کی شدید سردی اور پنجاب میں سعودی عرب جیسی برفباری؟

لاہور: محکمہ موسمیات پاکستان نے سوشل میڈیا پر گردش کرتی ملک میں 100 سالہ تاریخ کی شدید سردی اور پنجاب میں برفباری کی خبروں کی تردید کردی ہے۔

محکمہ موسمیات کی جانب سے جاری پریس ریلیز میں کہا گیاہے کہ حالیہ سوشل میڈیا پر گردش کرنے والی خبر، جس میں یہ دعویٰ کیا گیا ہے کہ 12 جنوری سے 15 جنوری کے دوران پاکستان کی 100 سالہ تاریخ کی سرد ترین راتیں اور دن ہوں گے، وسطی پنجاب کے مختلف اضلاع میں سعودی عرب کی طرح برفباری ہو سکتی ہے، بے بنیاد اور غیر تصدیق شدہ ہے۔

محکمہ موسمیا کی جانب سے جاری بیان کے مطابق پنجاب کے وسطی اضلاع میں برفباری کا امکان نہیں ہے کیونکہ یہ علاقے جغرافیائی اور موسمیاتی طور پر ایسی صورتحال کے لیے موزوں نہیں ہیں۔

محکمہ موسمیات کے مطابق، ملک کے بیشتر علاقوں میں موسم سرد اور خشک رہنے کی توقع ہے۔