مصطفیٰ عامر کی قبر کشائی کیلیے 3 رکنی میڈیکل بورڈ تشکیل

کراچی: ڈیفنس سے اغوا کے بعد دوست کے ہاتھوں قتل کئے جانے والے مصطفیٰ عامر کی قبر کشائی کیلیے میڈیکل بورڈ تشکیل دے دیا گیا۔

نجی ٹی وی نے نوٹیفکیشن کے حوالے سے بتایا کہ مصطفیٰ عامر کی قبر کشائی کے لئے 3 رکنی میڈیکل بورڈ تشکیل دیا گیا ہے اور مقتول کی قبر کشائی 21 فروری صبح 9 بجے ہوگی۔

نوٹیفکیشن میں بتایا گیا ہے کہ پولیس سرجن ڈاکٹر سمیہ سید میڈیکل بورڈ کی سربراہ ہیں جبکہ ایڈیشنل پولیس سرجن ڈاکٹر سری چند، ایم ایل او ڈاکٹر کامران بھی میڈیکل بورڈ کا حصہ ہوں گے۔

واضح رہے کہ مصطفیٰ عامر کی والدہ کی جانب سے قبر کشائی کیلیے درخواست کی گئی تھی، مقامی عدالت نے مصطفیٰ عامر کے اغوا اور قتل کیس میں مقتول کی قبر کشائی کی درخواست منظور کرلی تھی۔

عدالت نے اپنے حکم میں کہا تھا کہ سیکریٹری صحت قبر کشائی کے لئے میڈیکل بورڈ تشکیل دیں، قبر کشائی مکمل کرکے 7 روز میں رپورٹ پیش کی جائے۔