کوہلی کی سنچری کی بدولت بھارت نے پاکستان کو شکست دیدی

دبئی: آئی سی سی چیمپئنز ٹرافی کے پانچویں میچ میں بھارت نے پاکستان کو 6 وکٹوں سے شکست دے دی۔

دبئی میں کھیلے گئے میچ میں پاکستانی ٹیم نے ٹاس جیت کر پہلے بیٹنگ کا فیصلہ کیا اور پوری ٹیم 241 رنز پر ڈھیر ہوگئی اور بھارت کو جیت کیلئے 242 رنز کا ہدف دیا۔

ہدف کے تعاقب میں بھارتی ٹیم نے شاندار آغاز کیا اور ویرات کوہلی کی زبردست بیٹنگ کی بدولت 42 اعشاریہ 3 اوورز میں ہدف حاصل کرلیا۔

ویرات کوہلی نے پاکستان کے خلاف بیٹنگ کرتے ہوئے نہ صرف ون ڈے کرکٹ میں 14,000 رنز مکمل کیے بلکہ اپنی 51 ویں سنچری  بھی بنائی۔

پاکستان کے پاس شاہین شاہ آفریدی اور ابرار احمد کی موجودگی کے باعث بھارتی بیٹرز پورے اننگز میں چھائے رہے، اننگز کا جارحانہ آغاز کپتان روہت شرما اور شبمن گل نے کیا اور 4 اوورز میں ہی ٹیم کا اسکور 31 رنز تک پہنچا دیا۔

ایسے میں روہت شرما شاہین آفریدی کی 143 کلو میٹر فی گھنٹہ کی رفتار سے اندر آتی ہوئی یارکر کی بدولت کلیئن بولڈ ہوگئے، انہوں نے 15 گیندوں پر 1 چھکے اور 3 چوکوں کی مدد سے 20 رنز بنائے۔

جس کے بعد پاکستانی اسپنر ابرار احمد کی جادوئی کیرم بال نے خطرناک نظر آتے شبمن گل کو چلتا کیا، شبمن گل 100 کے مجموعے پر بھارت کے دوسرے آؤٹ ہونے والے کھلاڑی تھے۔

 ویرات کوہلی  اور شیریاس لیئر نے 114 رنز کی شاندار شراکت کی بدولت ٹیم کا اسکور 214 رنز تک پہنچا دیا، بھارت کے تیسرے آؤٹ ہونے والے کھلاڑی شریاس تھے  جو 56 رنز بناکر خوشدل شاہ کی گیند پر امام الحق کے ہاتھوں کیچ آؤٹ ہوئے، اس کے تھوڑی ہی دیر بعد ہاردک پانڈیا بھی 223 کے مجموعے پر شاہین شاہ آفریدی کی گیند پر وکٹ کیپر کو کیچ دے کر آؤٹ ہوگئے۔

بھارت کو جیت کے لیے 12 رنز درکار تھے اور کوہلی کو اپنی سنچری کے لیے بھی اتنے ہی رنز چاہیے تھے۔ اسٹیڈیم میں "کوہلی، کوہلی” کے نعرے گونج رہے تھے جبکہ پاکستان کی ٹیم کہیں نظر نہیں آ رہی تھی، ویرات کوہلی نے 111 گیندوں پر ناقابل شکست 100 رنز بنائے اور مین آف دی میچ کا ایوارڈ اپنے نام کیا۔ شاہین آفریدی نے دو جبکہ ابرار احمد اور خوش دل شاہ نے ایک ایک وکٹ حاصل کی۔

قبل ازیں پاکستانی ٹیم پہلے بیٹنگ کرتے ہوئے 241 رنز پر آل آؤٹ ہوگئی تھی اور بھارت کو جیت کیلئے 242 رنز کا ہدف دیا تھا۔

پاکستان نے بھارت کے خلاف ٹاس جیت کر پہلے بیٹنگ کرنے کا فیصلہ کیا۔ دبئی انٹرنیشنل اسٹیڈیم میں بھارت کے خلاف بیٹنگ کرتے ہوئے
پاکستان کی جانب سے بابر اعظم اور امام الحق نے اننگز کا آغاز کیا جبکہ بھارت کی جانب سے فاسٹ بولر محمد شامی نے پہلا اوور کروایا۔

پاکستانی اوپنرز نے ذمے داری اور محتاط طریقے سے اننگ کا آغاز کیا اور 6 اوورز میں ٹیم کا اسکور 26 رنز تک پہنچایا۔بابر اعظم 26 گیندوں پر 23 رنز بنا کر وکٹ کے پیچھے کیچ آؤٹ ہوئے جبکہ امام الحق 10 رنز بنا کر رن آؤٹ ہوکر پویلین واپس لوٹے۔

ایک موقع پر بابر اعظم نے شاندار کور ڈرائیوز لگانا شروع کیں تو بھارتی کھلاڑیوں میں پریشانی کے آثار نظر آنے لگے لیکن اسی دوران پاکستان کی پہلی وکٹ 8.2 اوورز میں41 رنز پر جبکہ دوسری وکٹ 47 رنز پر گر گئی۔

جس کے بعد کپتان محمد رضوان اور سعود شکیل نے 104 رنز کی شراکت قائم کی، پاکستان کے تیسرے آؤٹ ہونے والے کھلاڑی کپتان محمد رضوان تھے جو 46 رنز بنا کر اکشر پٹیل کی گیند پر بولڈ ہوگئے۔

ان کی وکٹ کے فوراً بعد ہی پاکستانی بیٹنگ لائن ایک مرتبہ پھر مشکلات کا شکار ہوگئی۔ پہلے سعود شکیل کا کیچ ڈراپ ہوا لیکن کچھ ہی دیر بعد وہ بھی 76 گیندوں پر 5 چوکوں کی مدد سے 62 رنز بنا کر آؤٹ ہوئے، یوں پاکستان کو چوتھا نقصان 159 کے مجموعے پر سعود شکیل کی صورت میں اٹھانا پڑا۔

پاکستان کے پانچویں آؤٹ ہونے والے کھلاڑی طیب طاہر تھے، وہ 165 کے اسکور پر 6 گیندوں پر 4 رنز بنا کر آؤٹ ہوئے۔ اس کے بعد 200 کے مجموعے پر پاکستان کے چھٹے کھلاڑی سلمان آغا 19 رنز بناکر آؤٹ ہوئے جبکہ اسی اسکور پر شاہین آفریدی بھی ایل بی ڈبلیو ہوگئے۔ نسیم شاہ 14 رنز بناکر  آؤٹ ہوگئے، حارث روف 8 رنز بناکر رن آؤٹ ہوئے جبکہ خوشدل شاہ 38 رنز بناسکے۔

بھارت کی جانب سے کلدیپ یادو نے 3، ہاردک پانڈیا نے 2، رویندرا جڈیجا، اکشر پٹیل اور ہرشیت رانا نے ایک، ایک وکٹ حاصل کی۔