مصطفی قتل کیس، مشہور اداکار کے گرفتار بیٹے کے اہم انکشافات

ساحر حسن کیخلاف مقدمہ درج

اسپیشل انویسٹیگیشن یونٹ (ایس آئی یو) نے ملزم ساحر حسن کے خلاف مقدمہ درج کر لیا ہے۔

پولیس کے مطابق سرکار کی مدعیت میں درج مقدمے میں لکھا گیا کہ ڈیفنس خیابان راحت فیز 6 کی گلی نمبر 6 میں منشیات فروشی کی اطلاع پر کارروائی کی گئی، جہاں ملزم کو ساڑھے 4 بجے پکڑا گیا جس نے اپنا نام ساحر حسن بتایا۔

ایف آئی آر کے مطابق گرفتاری کے وقت ملزم کے کندھے پر کالے رنگ کا بیگ تھا، جس میں سے 5 پیکٹ ویڈ کے برآمد ہوئے۔ پولیس کے مطابق بیگ سے ڈیجیٹل ترازو اور دیگر سامان بھی ملا، جبکہ ملزم کے قبضے سے موبائل فون اور نقدی بھی برآمد کی گئی۔

مقدمے کے متن کے مطابق برآمد ہونے والی ویڈ کا وزن 557 گرام تھا۔

ایس آئی یو حکام کا کہنا ہے کہ ملزم یحییٰ اور بازل نامی منشیات فروشوں سے ویڈ حاصل کرکے کراچی کے پوش علاقوں میں فروخت کرتا تھا۔

ساحر ایک روزہ جسمانی ریمانڈ پر پولیس کے حوالے

مقدمہ درج کرنے کے بعد ساحر خان کو ایس آئی یو نے جوڈیشل مجسٹریٹ جنوبی کی عدالت میں پیش کیا، جہاں تفتیشی افسر نے بتایا کہ ملزم کے قبضے سے 500گرام سے زائد منشیات برآمد ہوئی ہے۔

ملزم کے وکیل فراز فہیم ایڈووکیٹ نے کہا کہ ساحر حسن کو مقدمے میں پھنسایا گیا ہے، ساحر کا درخشاں پولیس کے ساتھ تنازع چل رہا ہے۔

ساحر حسن کے وکیل نے کہا کہ میرے مؤکل نے درخشاں پولیس کے خلاف دھمکیاں دینے کا کیس دائر کیا تھا۔

تاہم، اسپیشل مجسٹریٹ نے ملزم ساحر کو ایک دن کے جسمانی ریمانڈ پر پولیس کے حوالے کردیا اور ہدایت کی کہ ملزم کو کل متعلقہ عدالت میں پیش کیا جائے۔