چیمپیئنز ٹرافی، نیوزی لینڈ بنگلہ دیش کو ہرا کر سیمی فائنل میں پہنچ گیا

راولپنڈی:چیمپیئنز ٹرافی 2025 کے گروپ اے میں نیوزی لینڈ بنگلہ دیش کو5 وکتوں سے ہرا کر سیمی فائنل میں پہنچ گیا۔

بنگلادیش کی جانب سے دیا گیا 237 رنز کا ہدف کیوی ٹیم نے 5 وکٹوں کے نقصان پر حاصل کرلیا۔ راچن رویندرا نے شاندار سنچری بنائی، ہدف کے تعاقب میں کیوی ٹیم کا آغاز اچھا نہ تھا جہاں کین ولیم سن 5 اور پاکستان کے خلاف سنچری بنانے والے ول ینگ صفر پر پویلین لوٹ گئے۔ایسے میں راچن رویندرا نے پہلے ڈیون کانوے کے ساتھ 57 اور پھر ٹام لیتھم کے ساتھ  129 رنز کی پارٹنرشپ بنا کر میچ کو بنگلادیش سے دور کردیا۔

ڈیون کانوے 30 رنز بنا کر آؤٹ ہوئے جبکہ لیتھم کے ساتھ ناصرف سنچری پارٹنرشپ بلکہ اپنی سنچری بھی مکمل کرنے کے بعد راچن رویندرا 112 رنز بنا کر پویلین لوٹے۔

اختتامی لمحات میں لیتھم 55 رنز بنا کر رن آؤٹ ہوئے، تاہم نیوزی لینڈ پراس وکٹ کے گرنے کا اثر نہیں پڑا، کیویز نے پانچ وکٹوں پر ہدف 47ویں اوور میں حاصل کرلیا۔ بنگلادیش کی جانب سے تسکیم احمد، ناہید رانا، مستفیض الرحمن اور رشد حسین نے ایک ایک وکٹ لی۔

 قبل ازیں بنگلہ دیش نے نیوزی لینڈ کو جیت کیلیے 237 رنز کا ہدف دیا تھا۔ بنگال ٹائیگرز نے مقررہ اوورز میں 9 وکٹوں کے نقصان پر236 رنز بنائے۔

بنگلہ دیش کے کپتان نجم الحسن شانتو 77 رنز بنا کر ٹاپ اسکورر رہے جبکہ لوئر آرڈر بیٹر ذاکر علی نے 45، رشد حسین نے 26 اور اوپنر تنزید حسن نے 24 رنز بنائے۔

نیوزی لینڈ کی جانب سے مائیکل بریسویل نے 10 اوورز میں 26 رنز دے کر 4 کھلاڑیوں کو آؤٹ کیا۔ ول او رورکی نے 2 جبکہ میٹ ہینری اور کائیل جیمیسن نے ایک ایک وکٹ لی۔

ٹاس جیتنے والی ٹیم نیوزی لینڈ نے پلینگ الیون میں دو تبدیلیاں کرتے ہوئے ڈیرل مچل اور نیتھن اسمتھ کی جگہ کائل جیمیسن اور رچن رویندرا کو شامل کیا ہے۔

بنگلا دیش کی جانب سے بھی ٹیم میں دو تبدیلیاں کی گئیں۔ محمود اللہ اور ناہید رانا کو پلینگ الیون میں شامل کیا گیا جبکہ تنظیم حسن اور سومیا سرکار کو ٹیم کا حصہ نہیں بنایا گیا۔

بنگلا دیش کو اپنے پہلے میچ میں بھارت کے ہاتھوں شکست کا سامنا کرنا پڑا تھا جبکہ نیوزی لینڈ نے ابتدائی میچ میں میزبان پاکستان کو شکست دی تھی۔نیوزی لینڈ پوائنٹس ٹیبل پر پہلے جبکہ بھارت دوسرے نمبر پر موجود ہے۔