حضور نبی کریم ؐ کے ناموں پر مشتمل خطاطی کی نمائش کا افتتاح

اسلام آباد:سفیر جمہوریہ ترکیہ ڈاکٹر عرفان نذیر اوغلو نے جمعہکی شام ممتاز پاکستانی خطاط واصل شاہد کی حضور نبی کریم صلی اللہ علیہ وسلم کے ناموں پر مشتمل خطاطی کی نمائش کا افتتاح کر دیا۔ نمائش کا اہتمام ترک مرکز ثقافت یونس ایمرے انسٹی ٹیوٹ نے کیا ہے۔ یہ نمائش ممتاز ترک خطاط استاد حسن چیلبی کو خراج عقیدت پیش کرنے کے لیے منعقد کی جا رہی ہے۔ اس موقع پر یونس ایمرے انسٹی ٹیوٹ پاکستان چیپٹر کے سربراہ پروفیسر ڈاکٹر خلیل طوقار، 24 اسلامی ممالک کے سفیر اور ممتاز پاکستانی دانش ور اور ادیب بھی موجود تھے۔

ترک سفیر ڈاکٹر عرفان نذیر اوغلو نے اس موقع پرکہاکہ پاکستان اور ترکیہ مشترکہ ثقافت اور اقدار کے وارث ہیں جن پر کار بند رہ کر ہم دنیا میں برداشت اور روا داری کو فروغ دے رہے ہیں۔ انھوں نے کہا کہ پاکستان اور ترکیہ کی دوستی اور بھائی چارہ دنیا کے لیے ایک مثال ہے۔انھوں نے اس موقع پر خطاطی کے لیے واصل شاہد کی خدمات کو بھی خراج تحسین پیش کیا۔

ترک مرکز ثقافت یونس ایمرے انسٹی ٹیوٹ کے سربراہ ڈاکٹر خلیل طوقار نے کہا ہے ان کا اشارہ پاکستان میں مشترکہ ثقافتی روایات کو فروغ دے رہا ہے اور ان خوبصورت اقدار کو زندہ کرنے کی کوشش کر رہا ہے جو زندگی کے جدید طور طریقوں کی وجہ سے پس منظر میں جا رہی ہیں۔