دہشتگردوں کی لاشیں ورثاکے حوالے کر سکتے ہیں ، جتھے کے نہیں ،سرفراز بگٹی

کوئٹہ: وزیر اعلیٰ بلوچستان سرفراز بگٹی کا کہنا ہے کہ جعفر ایکسپریس حملے میں مارے گئے دہشتگردوں کی لاشیں ورثاکے حوالے کر سکتے ہیں لیکن جتھے کو نہیں دیں گے۔

بلوچستان اسمبلی میں خطاب کرتے ہوئے وزیر اعلیٰ نے کہا کہ گزشتہ روز ہسپتال میں رکھی گئی قابل شناخت لاشیں ایک جتھے نے لے جانے کی کوشش کی، ناقابل شناخت لاشوں کو دفنا دیا گیا۔

سرفراز بگٹی نے کہا کہ جب ٹرین کا واقعہ ہوا تو وہاں دہشت گردوں کے 2 گروپ تھے، ایک گروپ واپس جا رہا تھا تو فورسز کے ساتھ مقابلے میں 23 دہشت گرد مارے گئے، جب دہشت گردوں کی لاشیں سول ہسپتال لائی گئیں تو کچھ لاشیں شناخت کے قابل نہیں تھیں، جو لاشیں شناخت کے قابل نہیں تھیں انہیں دفنا دیا گیا۔

وزیراعلیٰ بلوچستان نے کہا کہ کچھ لاشیں ہسپتال میں شناخت کےلیے رکھی تھیں، کل ایک جتھے نے ہسپتال سے لاشیں لے جانے کی کوشش کی، ہم لاشیں ورثاکے حوالے کر سکتے ہیں لیکن جتھے کے نہیں۔