بیٹنگ چلی نہ باؤلنگ، پاکستان ناکام، سیریز کیویز کے نام

اوول: پانچ ٹی 20میچز کی سیریز کے چوتھے میچ میں نیوزی لینڈ نے پاکستان کو شکست دے کر سیریز اپنے نام کرلی۔

نیوزی لینڈ کی جانب سے دیے گئے 221 رنز کے ہدف کے تعاقب میں پاکستان کی پوری ٹیم 16.2 اوورز میں 105 رنز بناکر ڈھیر ہوگئی، میزبان ٹیم نے میچ 115رنز سے جیت کر سیریز بھی اپنے نام کر لی۔

قبل ازیں ماونٹ مونگانوئی کے بے اوول کرکٹ اسٹیڈیم میں کھیلے جارہے میچ میں پاکستان نے ٹاس جیت کر فیلڈنگ کا فیصلہ کیا تھا۔

ہدف کے تعاقب میں پاکستان کا آغاز انتہائی مایوس کن رہا، اوپنر محمد حارث 2، حسن نواز، کپتان سلمان علی آغا، شاداب خان اور عباس آفریدی صرف ایک، ایک رن بناکر پویلین لوٹ گئے۔

خوشدل شاہ، شاہین آفریدی اور حارث روف 6، 6 رنز بناکر آؤٹ ہوئے، عرفان خان نیازی نے 24 رنز بنائے۔ عبدالصمد 44 رنز بناکر آؤٹ ہوئے جبکہ ابرار احمد ایک رن کے ساتھ ناٹ آؤٹ رہے۔

نیوزی لینڈ کی جانب سے جیکب ڈفی نے 4، زکیری فولکس نے 3 جبکہ ول او رورک، جیمز نیشم اور اش سوڈھی نے ایک ایک وکٹ حاصل کی۔

اوپنر ٹم سیفرٹ اور فن ایلن نے ٹیم کو جارحانہ آغاز فراہم کیا تاہم سیفرٹ 44 رنز بناکر وکٹ گنوا بیٹھے، بعدازاں فن ایلن نے 19 گیندوں پر 50 رنز کی اننگز کھیل کر آؤٹ ہوئے۔

دیگر کھلاڑیوں میں مارک چیمپمین 24، جیمز نیشم اور مچل ہے 3، 3 رنز بناکر پویلین روانہ ہوئے جبکہ ڈیرل مچل 29 رنز کے مہمان ثابت ہوئے۔

میچ کے اختتامی اوورز میں کپتان مائیکل بریسویل نے 26 گیندوں پر 46 رنز کی اننگز کھیلی۔

پاکستان کی جانب سے حارث رؤف نے 3، ابرار نے 2 جبکہ عباس آفریدی نے ایک وکٹ حاصل کی۔