دہشت گردوں سے مقابلے کے لیے قوم کو متحد ہونا ہوگا، بلاول

لاہور : پاکستان پیپلزپارٹی کے چیئرمین بلاول بھٹو زرداری نے بلوچستان اور خیبرپختونخوا کے امن و امان پر خصوصی توجہ دینے اور قومی معاملات پر اتفاق رائے پیدا کرنے کو ناگزیر قرار دیتے ہوئے کہا ہے کہ دہشت گردی عروج پر ہے اور سیاست تقسیم کا شکار ہے، دہشت گرد بلوچستان اور خیبرپختونخوا سرگرم ہیں۔

لاہور میں گورنر ہاؤس پنجاب میں خطاب کرتے ہوئے بلاول بھٹو نے بلوچستان اور خیبرپختونخوا کی صورت حال پر تشویش کا اظہار کرتے ہوئے کہا کہ دہشت گردی کے پیچھے بین الاقوامی طاقتیں ہوں گی، پوری قوم اور تمام جماعتوں کو دہشت گردوں سے مقابلے کے لیے متحد ہونا ہوگا۔

بلاول بھٹو نے کہا کہ تمام جماعتوں کو ملک و قوم کے لیے ایک جگہ پر جمع ہونا ہوگا، اپوزیشن کو سیاست کرنی ہے تو وہ عوامی ایشوز پر بات کرے کیونکہ اب وقت ہے کہ ملکی مفادات کے لیے اجتماعی فیصلے کیے جائیں۔

چیئرمین پیپلز پارٹی نے کہا کہ پاکستان مشکلات سے دوچار ہے، پاکستان کے عوام غربت اور بے روز گاری کا سامنا کررہے ہیں، پاکستان کے عوام سیاست دانوں کی طر ف دیکھ رہے ہیں۔

ان کا مزید کہنا تھا کہ عوام کے مسائل کا حل ترجیح ہونی چاہیے، نیشنل سیکیورٹی اجلاس میں کچھ جماعتوں کی عدم شرکت افسوسناک ہے، ہمیں بلوچستان اور خیبرپختونخوا پر خصوصی توجہ دینے کی ضرورت ہے۔

بلاول بھٹو کا کہنا تھا کہ قومی ایشوز پراتفاق رائے پیدا کرنا ناگزیر ہے، تمام جماعتوں کو ذاتی مسائل کی بجائےملک اور قوم کے لیے اکٹھا ہونا ہوگا۔

بلاول بھٹو نے کہا کہ وزیراعظم سے اپیل ہے ایک بار پھر قومی سلامتی پر اجلاس بلائیں، حکومت سیاسی جماعتوں کو قومی سلامتی امور پر یکجا کرے، ملکی مفاد میں اجتماعی فیصلے لینا ہوں گے۔