پیکا ایکٹ 2025 کوفوری طور پر واپس لیا جائے،سی پی این ای

کراچی : کونسل آف پاکستان نیوز پیپر ایڈیٹرز(سی پی این ای) نے صحافی فرحان ملک اور صحافی وحید مراد کی گرفتاری اور راولپنڈی میں ٹریفک پولیس کے خلاف قانون اقدام کی ویڈیو وائرل کرنے والے ایک دکان کے مالک کی ایف آئی اے اہلکاروں کے ہاتھوں پیکا ایکٹ 2025 کے تحت حراست میں لیے جانے پر شدید تشویش کا اظہار کیا ہے۔

سی پی این ای کے صدر ارشاداحمد عارف اور سیکریٹری جنرل اعجاز الحق نے مشترکہ بیان میں کہا ہے کہ پیکا ایکٹ 2025 کی منظور ی کے وقت سی پی این ای اور دیگر صحافتی تنظیموں نے جن خدشات کا اظہار کیا تھا وہ اب اپنے برے اثرات کے ساتھ منظرعام پر آرہے ہیں۔

انھوں نے کہا کہ حکومت اور جمہوری ادارے آزادی صحافت سے متعلق ان معاملات کو آئین میں دیے گئے حق کی روشنی میں طے کریں۔اور اس تاثر کو مزید پختہ نہ ہونے دیں کہ پیکا ایکٹ حکومت اور سرکاری اہلکاروں کی بری کارکردگی پر پردہ ڈالنے کیلیے نافذ کیا گیا۔انھوں نے ایک بار پھر ارباب اختیار سے مطالبہ کیا کہ پیکا ایکٹ 2025 کوفوری طور پر واپس لیا جائے۔