قلات میں سکیورٹی فورسز کے آپریشن میں 6دہشت گرد جہنم واصل

راولپنڈی : بلوچستان کے ضلع قلات میں سکیورٹی فورسز نے انٹیلی جنس کی بنیاد پر آپریشن میں 6 دہشت گرد جہنم واصل کر دیئے۔
پاک فوج کے شعبہ تعلقات عامہ( آئی ایس پی آر) کے مطابق سکیورٹی فورسز نے قلات میں دہشت گردوں کی موجودگی کی اطلاع پر آپریشن کیا۔

ترجمان پاک فوج کے مطابق آپریشن کے دوران شدید فائرنگ کے تبادلے میں 6 دہشت گرد ہلاک کردیے گئے، ہلاک دہشتگرد قانون نافذ کرنے والے اداروں اور معصوم شہریوں کے خلاف شرپسند کارروائیوں میں ملوث تھے۔

آئی ایس پی آر کے مطابق علاقے میں پائے جانے والے دیگر دہشتگردوں کے خاتمے کیلئے سینی ٹائزیشن آپریشن جاری ہے ، پاکستان کی سکیورٹی فورسز بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں۔