کندھ کوٹ میں فائرنگ سے مزید 2 افراد جاں بحق، اموات 7 ہوگئیں

سکھر: ضلع کشمور کی تحصیل کندھ کوٹ میں گزشتہ روز معمولی تکرار پر 2 گروپوں کے درمیان ہونے والی فائرنگ کے نتیجے میں مزید 2 افراد جان کی باز ہارگئے، جس کے بعد 24 گھنٹوں میں مرنے والوں کی تعداد 7 ہوگئی۔

تفصیلات کے مطابق سندھ کے ضلع کشمور کی تحصیل کندھ کوٹ کے علاقے بڈانی شریف میں آج دوسرے روز بھی 2 گروپوں کے درمیان کشیدگی برقرار ہے، جہاں فائرنگ سے مزید 2 افراد کو قتل کردیا گیا،جس کے بعد 24 گھنٹوں میں مرنے والے افراد کی تعداد 7 ہوگئی۔

کندھ کوٹ کی یوسی بڈانی شریف میں ایک روز قبل بنگوار اور بھٹہ 2 قبائل کے درمیان معمولی بات پر جگھڑے سے خون ریزی کا سلسلہ شروع ہوا، مسلح افراد نے آج دوسرے روز بھی بڈانی شریف میں نجی کلینک پر دھاوا بول دیا، فائرنگ سے مزید 2 افراد عبدالرحمان ڈنگر اور منیر احمد ڈنگر جان سے ہاتھ دھو بیھٹے۔

یاد رہے کہ گزشتہ روز بھی دونوں گروپوں کے درمیان فائرنگ کے نتیجے میں 5 افراد جان کی بازی ہار گئے تھے۔