سندھ میں کوئی مافیا پشت پناہی کے بغیر جی نہیں سکتا، خالد مقبول صدیقی

کراچی :ایم کیو ایم کے کنوینرخالد مقبول صدیقی  نے کہا ہے کہ سندھ میں کوئی مافیا پشت پناہی کے بغیر جی نہیں سکتا، چوروں اور ڈاکوؤں کو تعاون مل رہا ہے ۔

خالد مقبول صدیقی کاکہنا ہے کہ پورارمضان شہریوں کے خون سے سڑکیں لہولہان ہوتی رہیں،کراچی کی گلیاں اور سڑکیں نوحہ سنا رہی ہیں،یہ غفلت اور بے رحمی کی سفاک داستان ہے،سینکڑوں نوجوان ڈکیتی مزاحمت پر مارے گئے،کراچی کی گلیاں اور سڑکیں چیخ چیخ کر نوحہ سنا رہی ہیں۔

ان کاکہناتھا کہ ڈمپر کی وارداتوں میں یہ تسلسل کسی خاص وجہ سے کیا جارہا ہے؟سندھ میں کوئی مافیا پشت پناہی کے بغیر جی نہیں سکتا، ایم کیو ایم ان حادثات کے تواتر پر پٹیشن دائر کرنے جارہی ہے،ڈکیتی متاثرین بھی پٹیشن دائر کریں گے،عدالتیں چھوٹےچھوٹے مسائل پر سوموٹو لیتی رہی ہیں،آج بھی سینکڑوں کیس عدالتوں میں سسک رہے ہیں،لیاری گینگ وار جیسا بھتہ خوری کا سلسلہ پھر شروع ہو گیا، چوروں اور ڈاکوؤں کو تعاون مل رہا ہے ،ایس ایچ او ڈاکو خود اپنے گاؤں سے لے کر آ رہا ہے۔

خالد مقبول صدیقی نے کہا کہ حکمران بتائیں ریاست بتائے وزیراعظم اور صدر بتائیں ہم کہاں جائیں۔ ہمارے احتجاج کو ہمیشہ غلط سمجھا جاتا ہے، ایم کیو ایم حادثات میں جاں بحق افراد کے لیے پٹیشن دائر کرنے جارہی ہے۔

کنوینرایم کیو ایم کاکہناتھا کہ سندھ کے شہریوں کو پنشن سے محروم رکھا جارہا ہے،جعلی ڈومیسائل والوں کو پنشن دی جارہی ہے،ایم کیو ایم نے پنشنرز کے حقوق کیلئے اقدامات کئے،ہم نے قانونی ٹیم تیار کرلی ہے،وفاقی بجٹ کا 60،سندھ کے بجٹ کا 97فیصد کراچی دیتا ہے،عید کے بعد شہرکے حقوق کیلئے جہاں جانا پڑا جائیں گے،کہا تھا سٹیک ہولڈرز کی مشاورت سے پیکا قانون بنایا جائے،ایم کیو ایم کے پاس سڑکوں پر آنے کا آئینی ، قانونی حق ہے۔