پنجاب میں عارضی نصب مکینیکل جھولوں پر پابندی عائد

لاہور: عید الفطر کے دوران پنجاب میں عارضی نصب ہونے والے مکینیکل جھولوں پر پابندی عائد کردی گئی۔

صوبائی حکومت کے مطابق انسانی جانوں کے تحفظ کیلئے لیا گیا، پابندی کا اطلاق پنجاب بھر میں ہوگا، ڈپٹی کمشنرز کے نام مراسلہ جاری کردیا، عید کے دوران تفریحی پارکوں میں بچوں سمیت لوگوں کی بڑی تعداد کی آمد متوقع ہے، شہری کھیل کے میدانوں، گیمنگ زونز اور مکینیکل جھولوں سے لطف اندوز ہونے کیلئے ان مقامات کا رخ کریں گے۔

مراسلے کے مطابق تفریحی پارکس، تھیم پارکس، پلے ایریاز میں مستقل بنیادوں پر لگائے گئے مکینکل جھولوں کی مشروط اجازت ہو گی، مستقل بنیادوں پر لگائے گئے جھولوں کیلئے فٹنس سرٹیفکیٹ کا حصول لازمی قرار دے دیا گیا ۔

دوسری جانب مستقل نصب جھولوں کے حفاظتی معائنے اور تمام ریگولیٹری معیارات پر عمل درآمد بارے متعلقہ ڈپٹی کمشنر سے تصدیقی سرٹیفیکیٹ لازم قرار دے دیا ، محکمہ داخلہ پنجاب میں مرکزی کنٹرول روم بھی قائم کر دیا گیا، کنٹرول روم 24 گھنٹے پنجاب بھر سے رپورٹس مرتب کرے گا۔

علاوہ ازیں امن و امان کا قیام اور حکومتی احکامات پر عمل درآمد یقینی بنایا جائے گا، سینئر افسران کی قیادت میں عید کی چھٹیوں میں کام جاری رہے گا۔