صہیونی فوج کا غزہ شہر پر زمینی حملہ، مزید 30 فلسطینی شہید

غزہ: صہیونی فوج نے غزہ شہر میں  زمینی حملہ کرتے ہوئے کم ازکم مزید 30 فلسطینیوں کو شہید کردیا، خان یونس میں اسرائیلی حملے میں 25 فلسطینی شہید ہوئے۔

خبر رساں ادارے کے مطابق غزہ کے محکمہ شہری دفاع نے بتایا کہ آج صبح سے جاری اسرائیلی حملوں میں کم ازکم 30فلسطینی شہید ہوگئے۔

جنوبی غزہ کے نصر ہسپتال کے طبی ذرائع نے بتایا کہ غزہ میں آج صبح سے جاری حملوں میں 30 فلسطینی شہید ہوگئے، خان یونس میں صرف ایک ہی حملے میں 25 افراد شہید ہوگئے۔دوسری جانب صہیونی فوج نے فلسطنی سرزمین میں قائم سیکیورٹی زون کو توسیع دینے کے لئے غزہ شہر میں نیا زمین حملہ شروع کرنے کا اعلان کردیا۔

اسرائیلی فوج نے ایک بیان میں کہا ہے کہ گزشتہ چند گھنٹوں میں فوج نے شمالی غزہ میں شجاعیہ کے علاقے میں زمینی سرگرمیاں شروع کر دی ہیں تاکہ سیکیورٹی زون کو بڑھایا جا سکے۔

ادھر” الجزیرہ” کی رپورٹ کے مطابق انسانی ہمدردی کی تنظیم مرسی کور نے متنبہ کیا ہے کہ غزہ میں انسانی بحران میں اضافہ ہو رہا ہے کیونکہ پورے ایک ماہ سے کسی امدادی ٹرک کو غزہ کی پٹی میں داخل ہونے کی اجازت نہیں دی گئی ہے۔

این جی او کے مطابق غزہ کی 85 فیصد آبادی بنیادی اشیائے خورد و نوش سے محروم ہے ، رپورٹ میں مزید کہا گیا ہے کہ 34 ہسپتال اور 80 صحت کے مراکز تباہ ہو چکے ہیں جبکہ طبی رسد کی شدید قلت نے صحت کی دیکھ بھال کو مفلوج کر دیا ہے۔

دوسری جانب حماس کے عسکری ونگ نے کہا ہے کہ لبنان میں اسرائیلی حملے میں حماس کے 2 ارکان شہید ہوئے ہیں جبکہ اسرائیلی فوج نے حملے میں حماس کے کمانڈر کو شہید کرنے کا دعویٰ کیا ہے۔

عزالدین القسام بریگیڈ نے ایک بیان میں کہا ہے کہ کمانڈر حسن فرحت کو جنوبی لبنان کے شہر سیدون میں ان کے اپارٹمنٹ کے اندر بیٹی جینان حسن فرحت اور بیٹے حمزہ کے ساتھ شہید کر دیا گیا۔