پاکستان ویمنز ٹیم نے بھارت میں شیڈول ورلڈ کپ کیلیے کوالیفائی کرلیا

لاہور : پاکستان ویمنز کرکٹ ٹیم نے رواں سال بھارت کی میزبانی میں ہونے والے آئی سی سی ورلڈ کپ کےلیے کوالیفائی کرلیا۔

ورلڈ کپ کوالیفائر ایونٹ میں پاکستان ویمنز نے تھائی لینڈ کو بھی ہرادیا اور مسلسل چوتھی کامیابی کے ساتھ میگا ایونٹ تک رسائی حاصل کرلی۔گرین شرٹس نے 6 وکٹ پر 205 رنز بنائے، تھائی لینڈ کی ٹیم 118 رنز بناسکی۔

لاہور میں تھائی لینڈ کے خلاف پاکستان ویمنز کی تین وکٹیں 47 رنز پر گر گئیں اس کے بعد سدرہ امین نے 80 رنز کی شاندار اننگز کھیلی،۔کپتان فاطمہ ثنا نے 62 رنز کی ناقابل شکست اننگز کھیل کر ٹیم کا اسکور 6 وکٹ پر 205 تک پہنچایا، انہیں میچ  کا بہترین کھلاڑی قرار دیا گیا۔ منیبہ علی 18 اور سدرہ نواز 11 رنز بنا سکیں۔

206 رنز کے تعاقب میں تھائی لینڈ کی کوئی بھی بیٹر پاکستانی بولرز کا جم کر مقابلہ نہ کر سکی، ایک ایک کر کے وکٹیں گرتی چلی گئیں اور پوری ٹیم 118 رنز بنا کر آؤٹ ہوگئی۔

قومی ٹیم کی جانب سے کپتان فاطمہ ثنا ، نشرا سندھو اور رامین شمیم نے 3،3 کھلاڑیوں کو آئو ٹ کیا، ایک وکٹ سعدیہ اقبال کے حصے میں اآئی۔