کراچی؛ گھر میں گیس لیکیج سے دھماکا، خاتون جاں بحق،2 افراد زخمی

کراچی: کلفٹن گلف ٹاور کے قریب  فلیٹ میں گیس لیکج کے باعث دھماکے کے نتیجے میں گھریلو ملازمہ جاں بحق اور لڑکی سمیت 2 افراد جھلس کر زخمی ہوگئے۔

 کلفٹن تھانے کے علاقے کلفٹن تین تلوارگلف ٹاورکے قریب فلیٹ میں گیس لیکج کے باعث دھماکے کے نتیجے میں 2 جوان لڑکیوں سمیت 3 افراد جھلس کر شدید زخمی ہوگئے جنہیں فوری طور پرایدھی ایمبولینس کے ذریعے سول برنس وارڈ منتقل کردیا گیا۔

دوران علاج جھلس کر شدید زخمی ہونے والی 20 سالہ کلثوم دوران علاج دم توڑ گئی، زخمی ہونے والوں میں 20 سالہ سدرہ اور50 سالہ فیاض شامل ہیں۔

ایس ایچ او کلفٹن میں بتایا کہ فیاض 80 فیصد جھلسا ہوا ہے اوراس کی حالت تشویشناک ہے ، جاں بحق کلثوم گھریلو ملازمہ تھی۔

انھوں نے بتایاکہ لیکج کے باعث گیس فلیٹ میں بھری ہوئی تھی گھریلو ملازمہ نے باورچی خانے میں جیسے ہی چولہا جلایا تو دھماکے کے باعث آگ بھڑک اٹھی، پولیس حادثے سے متعلق مزید معلومات اکٹھا کر رہی ہے۔