کراچی میں 84 انچ پائپ لائن پھٹنے سے پانی کی فراہمی بند، مرمتی کام جاری

کراچی: جامعہ کراچی کے قریب 84 انچ قطر کی پائپ لائن پھٹنے سے شہر کے بیشترعلاقوں میں پانی کی فراہمی بری طرح متاثر ہے۔ جامعہ کراچی کا 60 فیصد علاقہ زیرآب آ گیا ہے۔ رہائشی کالونی کے گھر پانی ہی پانی جبکہ تدریسی عمل غیراعلانیہ طور پرمعطل ہے۔ شہرکے بیشترعلاقوں میں پانی کی فراہمی بھی متاثر ہے۔

سی ای او واٹر کارپوریشن احمد علی صدیقی نے جامعہ کراچی میں پانی کی متاثرہ لائن کا معائنہ کیا۔ ترجمان نے بتایا کہ سی ای او نے مرمتی کام کی رفتار معیار اور ضروری سہولیات کا جائزہ لیا۔ سی ای او نے متعلقہ افسران کو کام مقررہ وقت میں مکمل کرنے کی ہدایت جاری کر دی۔

واٹر کارپوریشن کی ٹیم جامعہ کراچی میں پانی کی فراہمی بحال کرنے کے لیے سرگرم ہے، ترجمان کا کہنا ہے کہ سی ای او کو چیف انجینئر ڈبلیو ٹی ایم نے مرمتی کام کے حوالے سے بریفنگ دی، چیف انجینئر نے مرمتی کام مقررہ وقت میں مکمل کرنے کی یقین دہانی کرائی۔

سی ای او واٹر کارپوریشن احمد علی صدیقی نے کہا کہ مرمتی کام مقررہ وقت پر مکمل کرکے پانی کی فراہمی کی بحالی کو یقینی بنایا جائے۔ مرمتی کام میں کسی قسم کی تاخیر برداشت نہیں کی جائے گی۔

واضح رہے کہ کراچی میں چوراسی انچ قطر کی پائپ لائن پھٹنے سے جامعہ کراچی کا ساٹھ فیصد علاقہ زیر آب آ گیا ہے۔ رہائشی کالونی کے گھر پانی ہی، پانی جبکہ تدریسی عمل غیر اعلانیہ طور پرمعطل ہے۔ شہر کے بیشترعلاقوں میں پانی کی فراہمی بھی متاثر ہے۔ اب تک لاکھوں گیلن پانی ضائع ہو چکا ہے۔